Shillong, Lber 23 : U Myntri Rangbah ka jylla Conrad K Sangma hynne ka sngi u la ong ba ki khmih lynti ba mynta u snem kin lah ban pynurlong noh ïa ka Shillong Medical College ha ka Public-Private Partnership (PPP) mode.
Haba kren bad ki lad pathai khubor hadien ba wai ka Dorbar Mangtyngka, u Conrad u la ong ruh ba mynta ka jingïakren ka dang ïaid na bynta katei ka kam.
“Ka jingïakren ka dang ïaid mynta bad nga khmih lynti ba mynta u snem hi ngin ïohi noh ïa u soh,”u la ong. U Myntri Rangbah u la pynkynmaw ruh ba ka ka sorkar ha u snem ba la dep ka la pyndam noh ïa ka soskular ba ki la ïasoi na ka bynta ban seng ïa ka Shillong Medical College hadien ba kam shym la leh ei ei wat hadien ba la kut ka 10 snem.
“Kumta hadien ba la dep ban pyndam noh ïa ka soskular, ngi la wad shuh ki lad ki lynti bad kren ruh bad bun ki kynhun kynthup ïa ki hospital shimet ban wan treilang bad ngi. Ki la don ruh katto katne kiba la wan bad ïa kren,” u la ïathuh shuh shuh.
Nalorkata u ong ruh ba don kiba pan ka jaka khlem siew dor ban tei ïa ka hospital bad medical college bad mang pat ka bhah pule doktor na bynta ka jylla. Ïa kane ruh u ong ba ka kam ka dang ïaid shakhmat.
