Bun kiba wan ki dei ki briew kiba nabar da ka jingthmu ban pynklumar: Bah Sanbor

Shillong, Naiwieng 11: Ka jingïalang ba la khot da u Bah Sanbor Shullai uba dei u Myntri sorkar ïa ki Dorbar Shnong kiba hap hapoh ka Raid Riat Laban kala pulom noh hadien ba ki dkhot jong ka Joint Action Committee (JAC) pyrshah Ropeway kim pdiang ïa ka jingthmu ban thaw da ka Expert Committee da kaba thung ïa ki riew shemphang kiba nabar ba kin peit la kan ktah ne em ïa ka umbam umdih.
Marsien wai ka jingïalang na ka liang jong ki dkhot ka JAC kila bitar lep ïa ka jingpynwai kynsan u Bah Sanbor ïa ka jingialang da kaba kila hylla paidbah ba balei u khot ïa ki sha ka jingialang bad la i kumba kin kerkut ïa u.
Na ka liang ki briew jong u Bah Sanbor naduh ba la ieng na ka jaka shong kila iada ban lait na kino kino bad ïalam beit sha kali bad mar mar u la mih noh na State Convention Hall, Shillong.
Haba kren bad ki lad pathai khubor ha karma trei kam ha Secretariat u Bah Sanbor u la ong, hadien ba la sdang ka jingialang bad kum u MLA nga la kyrpad ïa ki ban kren u wei hadien u wei da kaba jai jai bad nga buh ha khmat jong ki ban thung ïa ka Expert Committee khnang ban lah ban ïalam sha u Myntri Rangbah ka jylla u Conrad K Sangma.
Ha ka jingiakren ka pyni kylla ba mar sien sdang kila shu kynthah beit bad kim sngap bad ki leh kumba ki leh ïa ki rangbah shnong bad ka jingthmu jong ki ka long ban wan pynklumar, ong u Bah Sanbor.
U Bah Sanbor u la ong, Ha ka por ba nga rung ban leit sdang ïa ka jingialang nga lah kylli ïa ki longkmie kiba bun ki ong ba kidei na Nongmensong, Malki, Polo na Lawsohtun bad kumba long hi hangto kiba bun kidei ba nabar katba ka jingkhot jong nga ka long thik tang ïa ka JAC bad ki Dorbar Shnong bad ki seng bhalang bad ki seng samla.
Wat la katta ruh da ka jingthmu ban iaid beit iaid ryntih, hadien ba la buh ka jingtyrwa la kin pdiang ne em ïa kane ka jingthmu bad lada ki pdiang ngin jied lang ia ka JAC, ki DS sengbhalang bad seng samla ban kynduh ïa u Conrad K Sangma, hynrei katba nga kren ki shuh thombor beit bad hylla bad katne ka pyni ba kim pdiang te nga pynkut noh ïa ka jingialang.
Halor kane ka jingbym pdiang jong ka JAC na ka liang u Bah Sanbor u la ong ka kamram kum u MLA nga la dep ban leh, myntanga ieh noh ha ka jingstad jong ka sorkar ha kaba ïadei bad kane ka kam.
Ki dkhot ka JAC kila kynnoh ba u Bah Sanbor ula pyni ia ka jingbym lah ban leh eiei halor kane ka kam namar ba um shym la kren ia ka sur u paidbah haba dawa ruh ba u dei ban hiar shuki noh. Ka JAC kala ieng skhem halor ka jingdawa ba dei ban pynduh ne pynkynriah noh ia ka project sha kawei ka jaka.
Ka Nongialam ka JAC Kong Angela Rngad kala kynnoh ba u Bah Sanbor ula pynwai noh ia ka jingialang hadien ba ula dep ban pynsngew ia ka jingthmu jong ka sorkar bad ula ailad tang ia 2 ngut ki kynthei ban kren ha ka jingialang hashuwa ba un mih noh, kaba la pynbitar lep ia ki dkhot ka JAC.
“U Bah Sanbor hapoh ka jingialang ula wanrah ia ka jingai jingmut ban tyrwa sha ka Sorkar ba kan thung da ka Expert Committee….. ngim donkam Expert Committee shuh. Sa kawei ruh u dei u nongmïohkhmat paitbah, ka kamram jongu ka dei ban pynsngew ia kaei kaba ki paitbah ki dawa ym ban wanlam ia ka khubor na ka Sorkar, namar lah kata sngi, ulah dei ban sngewthuh ia ka jingangnud jong ki paitbah” kala ong.