Shillong, Lber 23 : U MLA ka Mawlai, Bah Brightstarwell Marbaniang hynne ka sngi u la wanrah da ka zero hour notice ha Iing Dorbar halor ka jingshah dung jong uwei u samla ha kine ki khyndiat sngi ha Khyndailad.
U MLA ka VPP, u la pynpaw ka jingsngewkhia halor kane ka jingjia bad kyntu ïa ka Sorkar ban thwet ïa ki briew kiba donkti bad ban teh lakam ïa ka suk ka saiñ ha ka jylla
Hynrei haba jubab halor kane, u Symbud Myntri Rangbah ka jylla ba dei peit ïa ka tnad Kampohïing, Bah Prestone Tynsong u la ong ba halor katei ka jingjia ki don ruh ki khubor kiba la mih haba ïadei bad katei ka jingjia kiba khlem ïahap pat bad ka kaiphod na ka tnad pulit.
Shuh shuh u ong ruh ba namarba ka jingtohkit ka dang ïaid, kumta ïa ka jingshisha halor katei ka jingjia yn sa pyntip sha baroh, hadien ba ka jingtohkit ka la lap ïa ka daw tynrai jong katei ka jingjia.
“Nga shim ruh ïa kane ka kabu ban kyrpad ïa baroh ki paidbah ba kidei ban ailad ba ka ain kan pyndep ïa la ka jong ka kam, bad ban kiar na kaba pynphriang ïa ki khubor ki bym shisha, khamtam eh ha social media,” u la ong da kaba kular ruh ba ka tnad pulit ka la pyrshang ïa kaba bha tam ban sei pyrthei lut ia ki jingshisha halor katei ka jingjia bad ruh ban pynïoh ïa ka hok na ka bynta utei u lanot.
Ha kajuh ka por u la ïathuh ruh ba ki pulit ki la pyrshang lut ki lad ki lynti ban kem ia ka kynthei kaba donkti ban dung ïa utei u samla ba 25 snem ha Khyndailad dang shen. Lah ban kdew hangne ba u Zecharia Sohthiang, 25 snem ka rta ba shong ba sah ha Mawtary, Myrdon Umsning u la shah dung ha ka 19tarik mynta u bnai.
La ïathuh ruh ba utei u lanot u la dep ruh ban ai jubab ha u Investigation Officer halor katei ka jingjia.
U Bah Prestone u la ïathuh ruh ba naduh ka step 19tarik utei u lanot u la ai ka jubab kaba kyllain haba ïadei bad ka jaka bad ka por ba jia.
