Leit jngoh ka Myntri ïa ka longkmie ha Ganesh Das ba kynnoh bym biang ka jingai jingsumar

Shillong, Lber 23: Ka Myntri ba dei peit ïa ka tnat ka Koit ka Khiah jong ka sorkar jylla ka Kong Ampareen Lyngdoh ha ka sngi Palei ka la leit ban jngoh ïa kawei ka longmie kaba shah sumar ha Ganesh Das Hospital ïa kaba la tip kyrteng kum ka Kong Dris Mynsong na Thadrang hadien ba la mih ki jingkynnoh ba kane ka jaka sumar kam shym la ai jingsumar kaba paka kumba ka dei hok ban ïoh.
Haba kren sha ki lad pathai khubor hadien ba ka la dep ban wan ïakynduh ïa kane ka longkmie ka Kong Ampareen ka la ïathuh ba kane ka jingkynnoh ka long kaba bakla namar ki doktor naduh marsien poi kane ka long kmie ki la ai ka jingsumar kaba paka kumba ka dei hok ban ïoh.
“Hadien ba nga la dep ban ïakren markhmat ine i longkmie i la ïathuh ba ka jingmih ka jingkynnoh ka dei namar ka don ka jingsngewthuh bakla na ka liang jong i bad ka jingmih ka khubor ba ka jingkhlad i khun ha kpoh jong i ka dei namar ka jingleh sting ka hospital ka long kaba bakla haduh katta katta namar ine i long kmie i la dep tip lupa naduh shuwa ba in wan shah sumar hangne,” ka la ong.
Ka la ïathuh ba haba ïadei bad ka jingkam ba ka jaka sumar kam ai jingsumar eiei, “Namar ki doktor ki pyrshang ban ai da ki lad jingsumar bym donkam puid hynrei ba ine i longkmie in shu kha hi ïa ine i khun ba la khlad ha kpoh jong i kan kham shimpor katto katne sngi hynrei kata ka jingkynnoh ba ki doktor ki leh sting kam don satia,” ka la ong.
Ka la ong ruh ba ha ka jingleit jngoh jong ka ka la ïoh ban ïakynduh bad ki doktor ba dei peit ïa kane ka jaka sumar na ka liang jong ki ki la ïathuh ba kane ka hopital ka dei kaba jur tam ka jingwan kha khunlung kaba na ka liang ka sorkar kan ïaleh ban pynbha ïa kane ka jaka sumar ban lah ban ai jingshakri kaba kham paka shuh shuh sha ki paidbah ba shnaih ban ïoh jingsumar na kane ka Hospital jong ka sorkar.