1330 ngut ki nongkhaïi drok kiba la shah kem hapoh ka NDPS Act ha ki 13 snem

0

Shillong, Lber, 22: Palat 1330 ngut ki briew ki la shah kem ha ki 726 tyli ki case ba la rejistar hapoh ka NDPS Act ha ki 13 snem ba la leit noh.
Ïa kane la pyntip da u Symbud Myntri Rangbah ka Jylla uba peit ïa ka Home (Police) u Bah Prestone Tynsong haba jubab ïa ka Call Attention Notice ba la wanrah da u MLA ka UDP na Nongpoh Constituency u Bah Mayralborn Syiem hapoh ka Iingdorbar Thawaiñ ka Jylla ha ka sngi Palei.
Naduh u snem 2010 haduh ka 17 tarik, Lber, 2023, haduh 726 tylli ki case la rejister hapoh ka NDPS Act bad 426 tylli ki case ki dei kiba la pynngat kyndon, 77 tylli ki case ki dei kiba la pyndep ka jingtohkit bad 223 tylli ki case ki dei kiba dang don hapdeng ka jingtohkit, la ïathuh u Bah Tynsong.
Kumba 1,330 ngut ki briew ki la shah kem, 1193 ngut kiba la shah kem ki dei ki shynrang bad 117 ki dei ki kynthei, u la bynrap.
Ha kaba ïadei bad ka jingïoh kurup ïa ki jingdih pynbuaid, u Bah Tynsong u la ong ba ka tnat ka la ïoh ban kurup haduh 26,678.96 gram u drok heroin, 10,209.26 kilo u Ganja, 2796.36 gram u Opium, 93.33 kilo u dawai kuli Methamphetamine/Yaba tablets, 25,260.65 gram kiwei kiwei ki jingdih pynbuaid bad 90,321 bilor ka dawai jyrhoh (codeine cough syrup) naduh u snem 2010 haduh ka 17 tarik Lber, 2023.
U la ïathuh ruh ba ha ka jingkhynra ban ïohkem ïa kiba donkti ban khaïi ïa u drok da ka tnat Pulit, ka tnat ka la wanrah bun ki lad ki lynti ban tehlakam ïa ka jingkhaïi drok bad ban pynjur ïa ka jingai jingpynshai sha ki paidbah ban kiar na kaba pyndonkam ïa u drok.
U la ong ba la buh ïa ka Anti-Narcotic Task Force (ANTF) ha ki District hapoh ka jingkhmih jong ki Superintendent of Police jong ki district ban tehlakam bad ban ïada ïa ka jingkhaïi be-aiñ ïa u drok hapoh ka jylla.
Ka tnat Pulit ka la buh ruh saw tylli ki ksew ban thwet haba khynra drok ïa kiba la buh ha Dog Squad K-9 Unit, Shillong. Ka Narcotic K-9 Unit da ka jingïatreilang bad ki ANTF ki ju pynlong borabor ïa ka jingtalasi kyndit ïa ki kali ha shilynter ki surokbah ha ki jaka sor/ki shnong bad ha ki jaka ba kham kynrei ka jingkhaïi be-aiñ ïa u drok.
Shuh shuh, u Symbud Myntri Rangbah u la ïathuh ba ka tnat Pulit ka la tyrwa ban pynrung ïa ka kyndon kaba kham pyrkhing jong ka ‘The Prevention of Illicit Trafficking in Narcotics Drugs and Psychotropic Substances Act,’ ban kem ïa ki briew kiba mlien ban khaïi ïa u drok bad ïa ki jingdih pynbuaid.
“Ka tnat ka la shim ruh bun ki lad ki lynti ban pynkhlaiñ ïa ka Drug Testing Laboratory jong ka Jylla kaba dei ka Forensic Science Laboratory. Ka tnatka la buh ruh ïa ka Gas Chromatography Mass Spectrometry machine (GCMS) na ka bynta ban bishar ha kaba ïadei bad ka jingpyrkhing ïa ki dawai bad kumjuh ruh ha kaba ïadei bad ka jingthungkam ïa ki briew kiba tbit na ka bynta ka FSL,” u la bynrap.
U Bah Tynsong u la ïathuh ruh ba bun tylli ki jingai jinghikai kiba ïadei bad u drok la ju pynlong na ka bynta ki ophisar bad ïa ki Pulit jong ka Jylla ha Police Training School (PTS) bad ha CID Headquarters, Shillong.
“Ka tnat ka la phaikhmat ruh ha kaba ïadei bad ka Counseling bad ka Rehabilitation na ka bynta ki briew kiba la im kyrni ha u drok da kaba ïatreilang bad ki seng treimon sngewbha,” u la ong bad kyrpad ruh ïa ki paidbah ba ka jingisaitmet jong u drok kam dei satia tang ka kamram jong ki Pulit lane tang ka tnat Kam Pohing lymne tang ïa ki riewshimet / ki longing longsem kiba la shah ktah hynrei ka dei ka kamram jong iwei pa iwei ban shim ïa ka jingkitkhlieh.
“Nga kyrpad ïa ki nongshong shnong jong ka jylla ban ïasnoh kti lang bad ka tnat Pulit ban tem ïa ka jingkhaïi drok bad ka jingdih drok be-aiñ ha ka jylla khnang da ka jingïatreilang ngin sa lah ban rat dyngkhong ïa kane ka jingisaitmet ban warnah ïa ka lawei kaba phyrnai ha ki pateng kiba mynta bad ïa ki pateng ki ban sa wan,” u la bynrap.

Leave A Reply

Your email address will not be published.