Kyntait ka KHADC ba la ai NOC pynpoi lynti rel ha Byrnihat

Shillong, Lber 23: U Chief Executive Member jong ka Khasi Hills Autonomous District Council (KHADC) u Bah Titosstarwell Chyne ha ka sngi Palei u la kyntait war ïa ka jingkam u Symbud Myntri Rangbah ka jylla u Bah Sñiawbhalang Dhar hapoh ka Ïingdorbar Thawaiñ ka jylla ba ka KHADC ka la ai jingbit ne No Object Certificate (NOC) na bynta ban ïaid shakhmat ka jingtih ïa ka surok rel Tetelia sha Byrnihat.
Haba kren sha ki lad pathai khubor u Bah Titos u la ïathuh ba kumba ka KHADC ka ïeng ha ka nongrim ba katba ki trai jaka, ki nongshong shnong bad ruh ki khlieh nongsynshar bad ki paidbah kim pat pdiang ïa ka lynti rel ka KHADC ruh kan ïeng ha katei ka nongrim.
“Ngin ïeng skhem beit ha ka nongrim kaba ngi ïeng naduh kaba sdang ba katba ki paidbah kim pat pdiang ïa ka lynti rel ka KHADC ruh kan ïeng lang ha kata ka nongrim bad nga kwah ban ïathuh ïa phi ba ka jingkam u Symbud Myntri Rangbah ba ka KHADC ka la ai jingbit ka long kaba bakla namar ka EC jong ngi kam pat ai NOC satia bad nga peit ruh ïa ki rekod hapoh ka konsil ym don satia kano kano ka jingai NOC naduh ki EC kiba wan shuwa jong ngi ruh,” u la ong.
U la ïathuh ruh ba ha ka jingshisha na ka liang ka sorkar jylla ka la ïai pynkynmaw haduh 39 sien sha ka KHADC na bynta ban ai noh ïa ka NOC ban pynpoi lynti rel sha ka jylla.
“Lehse lada ka don kata ka jingïoh jingbit ka sorkar jylla kan dei beit shuwa ba ka Land Acquisition, Rehabilitation and Resettlement Act, 2013 kan treikam namar ha kane ka por shuwa ban treikam kane ka aiñ ym donkam jingbit na ka KHADC,” u la ong.
“Ngi ïohi ba u Symbud Myntri Rangbah u la kam ba ka KHADC ka la ai NOC na ka liang ka jong ngi ka konsil ngin pan jingshai na u halor kane ka jingkam jong u ha Assembly,” u la bynrap.