Wanrah u Conrad ïa ka mang tyngka kaba tam ka jingpynlut ïa ka jingïoh da T. 1592 Klur
Katto katne ki jingmang tyngKA ba kongsan l 2,226 Klur ban shna Surok l 15.5 Klur na ka bynta ki lynti suiñ l 3,882 Klur ïa ka PHE (3700 na ka JJM) l 400 Klur na ka bynta ka MeECL l 191 Klur na ka Information Technology l 20 Klur ïa ka Arts and Culture l Tnad Pule Puthi :2884 Klur, 2015 Klur na ka bynta ka tulop ki Nonghikai l Ka tnad ka koit ka khiah 1805 Klur tyngka l Tnad ri dohkha: 44 Klur tyngka
Shillong, Lber 23 : U Myntri Rangbah, u Conrad K Sangma, uba bat ruh ïa ka tnad Pla Tyngka, mynta ka sngi, ula wanrah ïa ka Mang Tyngka ka Jylla na ka bynta u snem 2023-’24 kaba duna 1,592 klur tyngka lane kaba ka jinglut ka heh ïa ka jingmih.
U Myntri Rangbah, u la ong ha ka jingmih hapoh ka snem la mang ba kan mih 19,442 Klur tyngka katba ka jingpynlut kan kan long 21,034 Klur tyngka. Kane ka jingpynlut ba 21,034 klur tyngka ka khlem kynthup ïa ka jingsiew ram kaba la buh ban siew 988 klur tyngka hapoh ka snem.
Ula ong ba ka jingsiew sut na ka bynta u snem 2023-2023 la khein antad b aka kot T. 1,169 klur bad ka jingsiew ia ka baibam tynmen (pension) ka long T. 1,794 klur.
Haba wanrah ia kane ka mang tyngka sha ki paidbah ka Jylla, u Myntri Rangbah ula ong “Nga kwah ban pynlong ïa kane ka mang tyngka kum ka mang tyngka u paidbah”.
Ha kane ka jingwanrah ïa ka mang tyngka, u Myntri Rangbah u la ïai ban ïa ka jingkular ban pynkylla ïa ka Meghalaya kum kawei na ki jylla kiba wan hakhmat na ki shiphew ha kine ki shiphew snem ban wan.
U Myntri Rangbah, u la ïathuh ruh ba ka thong ba kongsan jong ka sorkar MDA-2 ka long ba ha kine ki san snem ban wan yn kyntiew ïa ka jingioh ka jylla na baroh ki liang ne kata ka Gross State Domestic Product (GSDP) sha ka 80,000 klur tyngka bad ban pynlon ia ka Meghalaya ka 10 billion-dollar economy ne ban kyntiew ia ka ioh ka kot sha ka 10 billion dollar. Ka jingpynleit jingmut kan long ha kaban kyntiew ia ka jing pynlut na ka Sorkar bad ka jingkynshew shimet lyngba ka kam khaii, kam jngohkai, ka rep ka riang bad kiwei kiwei.
U Conrad ula ong ba ka Sorkar kan trei borbah ruh ban kyntiew arshah ïa ka jingïohkamai ki nongrep na ka bynta ki 6 lak tylli ki longiing ha ki jaka nongkyndong, nangta ban pynhiar sha ka jingbym don ba ïap shuh ki Khunlung ba kha bad ki Kmie ha ka por ba kha Khun da kaba pynthikna ba kin leit kha khun ha ki jaka sumar.
U la ong ruh ka sorkar kan pynthikna ba baroh ki khynnah kin ïoh ïa ka lad ba biang eh ba kin khie kin san ha ka rukom kaba dei bad ban aikam ia 5 ngut ngut ki samla haba pynleit jingmut haki kam rep kam riang, digital service, sengkam lajong bad ka kam jngohkai.
Ha kane ka mang tyngka bad ka ban long ruh kaba kham ñiar na ki mang tyngka, u Myntri Rangbah u wanrah ruh ïa ka mang tyngka ba kynthup ïa ka jingmang pisa sha ka jingïakhun ban tehlakam ïa ka jingpynjot ia ka mariang
Ka jingmang pisa sha ki kam iada mariang na ka bynta u snem 2023-2024 ka long 3,412 klur tyngka kaba long kumba 15% na ka mang tyngka jong ka jylla.
U Conrad ula ong ba mei mariang jong ka Jylla Meghalaya ka dei kaba suk palat ban pynjot bad ka kamai ka kajih jong ki lak ngut ki nongshongshnong ka Jylla ka shaniah tylli ha ka mariang. Namar kata,ka jingpynleit jingmut ha ki kam iada mariang ka long kaba kongsan bha ïa ka jingkiew shakhmat ka Jylla.
Haba pynpaw ba ka Meghalaya kan trei tyngeh ban pyntreikam ïa ki projek ban ïada ïa ki khlaw, u Myntri Rangbah ula ong ba kumba 88 lak tynrai ki dieng la dep ban thung ha kine ki san snem bala leit noh ba kin pynkylla khlaw ia ka jaka ba 10,000 hektar.
U Conrad ula pynbna ruh ba kumba 50,000 hektar ki jaka khlaw kin ïoh jingïada na kane ka prokram bad 250 klur tyngka yn sa ai sha ki Shnong ki thaw ha kine ki san snem ban wan.