Kylla um ktieh ka Wah Umlew na ka jingtih surok ka Dhar Company

Nongpoh, Jylliew 11: Ki nongialam jong ki 9 tylli ki shnong kiba hap hapoh ka thaiñ Nongtraw, Ri Bhoi District, hapoh ka lama jong ka Wah Umlew Protection Committee, mynta ka sngi ki la pynpaw ïa ka jingsngewkhia kaba jur halor ka jingshah pynjaboh jong ka Wah Umlew, kaba dei kawei na ki wah kiba ki paidbah shnong ki la ri bad sumar bha la bun snem ban pynneh ïa ka jingkhuid bad ka jingitynnad jong ka.
Na ka bynta ban ïada bad sumar ïa kane ka wah, ki nongialam shnong jong kine ki 9 tylli ki shnong ki la thaw ïa ka Wah Umlew Protection Committee, kaba don ïa ka thong ban pynneh pynsah ïa ka mariang bad jingïada ïa ka wah na kino kino ki kam kiba lah ban pynjulor ïa ka. Ka Committee ka la pyrshah ruh ïa ki jingleh be-aiñ kum ka jingwieh dawai, jingpynbthei bom bad jingkawang jar ha ka wah, khnang ban pynneh pynsah ïa ki doh um doh wah bad ïa ka jinglong khuid jong ka wah.
Haba kren sha ki lad pathai khubor mynta ka sngi, u Secretary jong ka Wah Umlew Protection Committee, Bah Pynskhemlang Sohtun, u la ong ba ka Wah Umlew ka dei ka tyllong jingmyntoi kaba khraw ïa ki paidbah nongshong shnong katei ka thaiñ, namar la pyndonkam ïa ka ha ka rep ka riang, ka sum ka sait, ka khlieng bad kiwei pat ki jingdonkam man ka sngi. Nalor kata, ka wah ka dei ruh ka jaka sah jong ki jait doh um doh wah kiba ki paidbah ki ju ri burom bad pynneh pynsah.
Hynrei, kaba pynsngewsih ka long ba mynta ka um jong katei ka wah ka la kylla rong saw kum ka um ktieh ha shilynter jong ka wah. U Bah Sohtun u la ong ba katkum ka jingshem jong ka Committee, kane ka jingshah pynjaboh ka dei na ka jingtih surok ba la pyntrei da ka Dhar Construction Company na Nongkohlew sha NEIGRIHMS, kaba la pynlong ïa ka khyndew ban tuid sha ka wah.
U la ïathuh ruh ba ha ka 20 tarik u Jymmang, 2026, ki nongialam shnong lyngba ka Committee ki la aiti da ka jingthoh sha u Manager jong katei ka company, da kaba kyrpad ban shim noh ïa ki lad jingïada kiba biang khnang ban lait na ka jingtuid khyndew sha ka wah. Hynrei haduh mynta, kim pat ïohi ba la shim ïa kino kino ki sienjam kiba paka ban tehlakam ïa kane ka jingeh.
“Ka Committee kam pyrshah ïa ki kam pynroi ne kam kwah ban pynthut ïa ki projek jong ka sorkar.Hynrei ngi sngewkhia namar ba ym shym la shim ïa ki lad jingïada kiba biang ban pynneh ïa ka jingkhuid jong ka wah”, ong u Bah Sohtun.
Namarkata, ka Committee bad ki paidbah jong kine ki 9 tylli ki shnong ki kyrpad jur ïa ka sorkar ba kan shimkhia mardor halor kane ka kam.Ki la ong ba ka Wah Umlew ka dei ka jingïm jong bun ki shnong ha katei ka thaiñ, bad kumta ka donkam ïa ka jingïada kaba kyrkieh.
U Bah Sohtun u la bynrap ba lada kane ka jingjaboh ka dang ïai bteng bad ka um jong ka wah ka dang sah saw kumjuh, ka Committee kan sa hap ban shong pyrkhat bad wad da kiwei pat ki lad ki lynti ban ïada ïa katei ka wah.