La heh mynsiem ki kali kamai ba mab ka sorkar ïa ka kuna bad khajna kali

Shillong, Jylliew 11 : Ka Sorkar Meghalaya lyngba ka Tnad Transport ha kane ka sngi Palei ka la pyllait paidbah ïa ka One-Time Settlement (OTS) Scheme, kaba thmu ban ai jingïarap ïa ki trai kali kamai da kaba mab bun bha ka kuna kot kali kumjuh ïa ka khajna kot kali kaba ki khlem lah shuh ban siew da ki bun bun snem.
Haba pyllait paidbah ïa kane ka skim, u Symbud Myntri Rangbah ba peit ïa ka tnad Transport, Bah Sniawbhalang Dhar u la ïathuh ba ka sorkar jylla kan mab haduh 90 persen ka kuna (Fitness Certificate) ïa ki kali kamai bad 80 persen pat na ka bynta kiwei ki khajna kali (Goods & Passengers Tax).
U Myntri u la pyntip ba baroh ki khajna bad kuna kiba la sahteng khlem lah siew la katno katne snem mynshwa kin shah kynthup hapoh kane ka skhim katkum ka rukom ba la mynjur da ka Sorkar.
Katkum ka jingïoh lum jingkheiñ jong ka tnad Transport, ka pisa kaba dang sah ban siew kum ka khajna sha ka sorkar ka la kot sha ka 1,100 klur, kiba kynthup kumba 900 klur tang na ki kuna kiba ïadei bad ki Fitness Certificate. Kumta, na ka liang ka Tnad Transport ka khmih lynti ba lada ki trai kali ki shim kabu ïa kane ka skhim bad pyndep ïa ki jingsiew jong ki, ka sorkar ka lah ban lum khajna kumba 180 haduh 200 klur tyngka ei ei.
La ïathuh ruh katkum ki jingtip ba la ïoh lum, la paw ba ki don haduh kumba 65,000 tylli ki kali kiba khlem pat siew ïa ka khajna Motor Vehicle, nangta12,642 tylli ki kali ki dang sah khlem pat siew ïa ka Goods and Passenger Tax, bad palat 57,000 tylli ki kali ki dang sahkut ha ki kuna kiba ïadei bad ki Fitness Certificate.
Kumta, halor kane na ka liang u Symbud Myntri Rangbah u la kyntu ïa ki paidbah kiba dei ki trai kali kynthup naduh ki trok kamai ba kin shim kabu ïa kane ka skim katba ka sorkar ka dang plie lad haduh ka 31tarik Nailar, 2026 da kaba siew dep ïa ki khajna baroh khnang ba kin lah pat ban sdang biang ïa ka kamai kajih jong ki.
U la ban jur ruh ba hadien ba ka skhim ka kut, ki trai kali kin hap ban bteng ban siew man ka por lane man u bnai katkum ki aiñ kiba treikam mynta. U la ong ba ka sorkar kam lah ban wanrah ïa kum kine ki skhim pyllait khajna man la u snem.