Ka Balang ka hikai barabor ba ngim dei ban duh jingkyrmen : Most. Rev Victor Lyngdoh
Bteng ka Balang Katholik ban burom ïa kiba khladnoh
Shillong, Naiwieng 15: Kum shi bynta ban pyndep ïa ki jingleh burom ïa kiba la khlad noh ha une u bnai kumba la buh da ka Balang, ka Balang Katholik ka la buh ïa u Naiwieng ba un long u bnai ban duwai kyrpang na ka bynta ki mynsiem kiba la khlad noh ha ka jingngeit ba ka mynsiem kan poi sha bneng hakhmat u nongbuh nongthaw bad ba ym dei ban burom ïa ki tang ha ka por ba ki dang im hynrei ban burom ruh ïa ki wat hadien ba ki la khladnoh na kane ka pyrthei.
Lah ban ong ba u Naiwieng ka Balang ka la buh ban kynmaw ba duwai kyrpang na ka bynta kito ki mynsiem kiba la khlad namar ha ka jingngeit ka Balang Katholik ba kum ki briew ki don ka lait la let kumta ka mynsiem kan nym lah ban poi beit sha u nongthaw, ki ngeit ba ki poi ha dingpynkhuid ban pynbit pynbiang shuwa ban poi ha khmat u nongthaw.
Ka Balang mynta u bnai naduh ba sdang haduh ba kut ka pynlong ïa ka jingkyrkhu ïa ki lum jingtep ban duwai na ka bynta ki mynsiem kiba la khlad ba u nongbuh nongthaw un pynjem ïa ka mynsiem jong kiba la khlad.
Ha ka sngi U Blei ki parish ha kylleng jong kane ka sor Shillong kila pynlong ïa ka jingkyrkhu ïa ki lum jingtep, bad ha Visitation Church ha Parish Mawprem la wan ha ka sngi U Blei la wan ban ïa shim bynta da u Lyngdoh Sad u Most Rev. Victor Lyngdoh ha ka jingdon lang ki Lyngdoh Sohblei bad ki riewniam ha ryngkat kiba ha ïing ha sem bad ki paralok jong ki mynsiem ba la pynthiah ha u tei u lum jingtep.
Ha kane ka sngi ym tang kiba long Katholik kiba la wan ban sakhi ïa kane ka jingleh burom kaba manla u snem, hynrei wat kiwei ruh ki Balang ne kiwei pat ki niam kiba don ïa la ki jong kiba ieid ba thoiñ ba la tep ha utei u Lum Kyntang jong ka Balang kiba la wan ban buh syntiew, thang mombati bad duwai kum ka dak ban kynmaw burom ïa kiba ieid ba thoiñ kiba la khlad noh ha shwa jong ki.
Haba kren ha ka jingleh niam u Archbishop Most Rev. Victor Lyngdoh u la ong ba kum ka Balang kam ju kwah ba ki paid riewngeit kin duh ki jingkyrmen hynrei ba dei ban don beit ka jingkyrmen bad kumta ka ngeit ba kine kiba la khlad noh, watla ym tip la ki la poi sha ka jaka shongneh kaba suk kynjai ne ki dang donkam ïa ki jingduwai jong kiba dangim, kumta donkam ban duwai, ban burom ïa kiba la khlad noh khnang ba kan long ruh kum ka nuksa na ka bynta jong kiba dangim ban long barabor kiba la pynkhreh bad ban sngewthuh ba kane ka pyrthei ka dei tang ka jingïaid pilkrim bad ka ïingshong basa.