Nongpoh, Nailar 28: Ka Central Agricultural University, Imphal, Manipur ryngkat ka jignïatrei lang bad ka NAHEP, ICAR, New Delhi ka la plie paidbah noh mynta ka sngi ïa ka prokram ai jinghikai ba krypang shaphang ka kam rep tynrai (Natural Farming) kaba la sdang mynta ka sngi bad ka ban sa kut noh haduh ka 10 tarik u Nailur 2023 ba la pynlong ha College of Agriculture, Kyrdemkulai ha Ri Bhoi District.
Ha ka jingsdang jong kane ka prokram ai jinghikai ki la wan poi haduh 35 ngut ki nongshim bynta ha ka kyrdan Assistant Professor na ki jaka pule bapher bapher ba kynthup naduh na Odisha University of Agriculture & Technology (OUAT), Bhubaneswar; Bidhan Chandra Krishi Viswavidyalay (BCKV), West Bengal, Assam Agricultural University (AAU), Jorhat Central Agricultural University. Imphal.
La wan shim bynta ruh haduh 30 ngut ki nongai jingkren kiba la dei ki riew shemphang halor ka kam rep tyrnai hapoh ka ri kiba dei na India bad wat na shabar jong ka ri India.
Na ka liang ka Indian Council of Agricultural Research (ICAR), New Delhi ka la jied ïa ka CAU Imphal ban pynlong ïa kane ka prokram kyrpang halor ka kam rep ka kam riang ba la bei tyngka ruh da ka NAHEP. Haba plie ïa kane ka prorkam ai jinghikai la pynïaid da u Dr. Anupam Mishra, Hon’ble Vice Chancellor ka CAU, Imphal.
Kumba la pynpaw da ka National Agricultural Higher Education Project (NAHEP), ka jingthmu kyrpang ba la pynlong ïa kane ka prokram ka long ban dang pyntbit shuh shuh ïa ki nonghikai kiba dei peit shaphang ka rep ka riang na ka bynta ban pyntreikam thikna halor ka rep tynrai (Natural Farming) bad khamtam ban pynrung ruh ha ki UG Degree kaba dei shaphang ka rep tynrai ba ioh jinghikai ha kylleng ka ri India.
Haba sdang kane ka prokram la pdiang sngewbha da u Prof Dwipendra Thakuria, Dean, College of Agriculture, Kyrdemkulai bad u Dinesh Kulkarni, All India Organizing Secretary and Sangathan Mantri, Bharativa Kisan Sangh, India u la shim bynta kum u kongsan.
Kiwei kiwei kiba la ïa don lang ha kane ka sngi ki kynthup naduh u Manoj Solanki, Farmers’ Representative, ICAR Governing Body, u Prof. PP. Shastry, Retired Dean, College of Agriculture, Khandwa, Madhya Pradesh bad u Dr. V.K. Mishra, Director, ICAR RC ka NEH Region, Umiam, Meghalaya kiba la shim bynta kum ki symbut kongsan.
Ha kane ka sngi ba la plie ia kane ka prokram ai jinghikai la pynkut ruh da kaba pynlait paidbah ruh ïa ka Handbook on Natural Farming: Principles and Practices”, Volume 1.
