Sha u Deputy Commissioner pynsngew ka SRS halor ka jingkiew ka jingpang khmat ha Ri-Bhoi District

Nongpoh, Nailar 28: Namar ka jingkiew jong ka jingpang khmat Conjunctivitis ha Ri-Bhoi District, ka Synjuk ki Rangbah Shnong, Ri-Bhoi District mynta ka sngi kala leit ban ïakynduh syndon ïa u Deputy Commissioner ka Ri-Bhoi District u Arpit Upadhyaya halor ka jingnang kiew kiba ioh ïaka jingpang khmat (Conjunctivitis) naduh ki rangbah haduh ki khynnah kaba la wanrah jingeh kaba khraw namar katei ka jingpang ka dei ruh ka jingpang kaba ïabit.
Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong u la pynpaw ba kum ka Synjuk ki dap da ka jingsngewkhia kaba khraw halor ka jingnang kiew katei ka jingpang saw khmat katba nang mih ki sngi ba bun naki paidbah ki hap ban pep trei bad kumjuh ki khynnah skul ruh ba duh ïaki klas namar ka jingiabit jong katei ka jingpang.
Halor katei ka bynta naka liang ka Synjuk kala kyrpad ruh sha u DC ba u dei ban shimkhia ban phah ïaka kynhun ka tnad ka koit ka khiah sha ki shnong lane sha ki skul ban peit bñiah ïa katei ka jait jingpang, bad ban ioh ka jingbthah naki doctor ban shim dawai, bad kumba ka sorkar ba bthah ïaki paidbah ban deng da ki ïiitkhmat ïong ka pat kaba eh ïaki longing ba duk ba rangli ha kaba la kyrpad ruh ba ka sorkar ka dei ban pynbiang ïaki ïitkhmat kumba pynbiang mask haka por ka khlam Covid-19.
Shuh shuh naka liang ka Synjuk kala pynpaw ruh hakhmat u DC halor ka jingrem palat ka bai register jaka bad bun naki paidbah ki shem jingeh ban register ïaki jaka namar ka jingrem palat ka dor bad bunsien ki paidbah bad ki nongïalam shnong ki pynpaw ba ka bai register ka kham rem ban ïaka bai jaka kaba pynlong ïaki paidbah ban kynran dien khamtam haki jaka khappud bala donkam eh ïaka sorkar ban shimkhia ïa katei ka mat naka bynta ban pynneh ïaki jaka.
Halor kitei ki mat ba ka Synjuk kala leit ban kynduh ha katei ka sngi naka liang u DC u la kular ban shimkhia ïa kitei ki kam naka bynta ka jingbit jingbiang jong ki paidbah.