Ka jingjia ha Thangskai ha ka 24 tarik mynta u bnai bad ka ka jingjia ha ka Lapangap ha ki sngi kiba bud, ka wanrah ïa ki artylli ki dur kiba shai halor ka jinglong bad ka jingtreikam ki Pulit jong ka jylla. Ka daw ka long ba ha Thangskai kaba dei ka jaka ha ka jylla bad ka jingïatyngkhuh ka long bad ki paidbah ki Pulit ki leh kum ki Khla, katba ha Lapangap, kab dei ha khappud bad ka Assam bad ka jingïatyngkhuh ka long bad ki jaidbynriew Karbi, ki Pulit Meghalaya ki long kum ki Khnai.
Hadien ba la mih ki khubor jong kine ki artylli ki jingjia ha ka jylla, ki paidbah ki la pynpaw ka jingbitar ïa ka jingleh ki Pulit ka jylla, namar ha ka jingjia kaba la jia ha Thangskai ha ka por ba pynlong ïa ka Public Hearing jong ka Meghalaya Cements Limited lane ka dewbilat Topcem, ka la paw shai ïa ka jingleh donbor ki Pulit kiba la shu bom shu tied ïa ki paidbah kiba la mih ban pyrshah ïa ka jingleh sop sop ki bor synshar District bad ka MSPCB, ha kaba ki la shna ïa ka Dara ban pynlong ha kawei ka jaka bad pyntip ruh ba ka Public Hearing ka khlem long shuh, katba ki la pynlong pat ha poh Compound jong ka MCL.
Ka jingpynlong ïa ka Public Hearing ha ka jaka jong ka MCL ka la kdew shai ba kane ka jingpynsngew paidbah kadei kaba la noh shiliang lypa, namar kam lah ban long ba ha ka jingpynsngew paidbah yn leit ban pynlong ha ka liang kaba dei ban shah bishar ne ban shah pynsngew.
Kawei pat ka long ba ha ki Public Hearing kiba kum kine hi dei ban shah lang ïa baroh arliang ne ban ailad lang ïa kiba kyrshan bad kiba pyrshah ruh. Kata kadei ka jingmut jong ka Public Hearing. Lada ka jingpynsngew paidbah ka shim tang na ka jingpynpaw ka liang kaba kyrshan, ka mut kam don jingmut eiei kata ka Public Hearing, kadei tang ka jingpyndep rukom. Ha ki snem kiba ladep, ha ka por ba ka don ka Public Hearing halor ka jingtih Uranium na ki thain Mawthabah- Nongbah Jynrin, ka Public Hearing ka long kaba heh bha bad kat ka jingïapyrshah kaba jur halor ka jingtih Uranium, hynrei ha ka Public Hearing pat ka la ailad lang ïa kiba kyrshan bad kiba pyrshah ruh kumjuh, ym don kano kano ka jingkhang.
Kaba lyngngoh ka long pat balei ba ha kine ki Public Hearing kiba ïadei bad ki Cements Company bunsien ym ju ailad ïa kiba pyrshah ban pynpaw ïa ka jingsngew jong ki. Dei na kane ka daw imat ba ka sorkar ka la phah da ki Pulit kiba don da ki phew ngut ryngkat ka kieng atiar bha la kum kito kiba leit ban pahara ne ban tem ïa ka jingïakulmar bad ïakynad ïapher jaidbynriew.
Kawei pat kaba la ïohi na ka jingjia ha Thangskai ka long ba ki Pulit ym tang ba ki la thombor ïa ki paidbah, hynrei don ki Pulit kiba la pyndonkam bakla ïa ka bor jong ki, da kaba ktah kti ban thap, ban kynjat bad kyrdem ïa ki paidbah,. Ym ju don aiñ ba ki Pulit kin ktah kti ïa ki paidbah. Nangta wat ïa ki kynthei kiba ïaid lynti ruh la ïohi ba ki la bom da u lathi. Hato ki Pulit ki ïoh training ha kane ka rukom seh?
Phai pat sha ka jingjia ha Lapangap, ki Pulit ki la pynlehraiñ hu suiñ ïa ka jylla, haba ha jaka ba kin ïada kin ïakhun ïa ki Karbi kiba thmu ban wan thombor ha Shnong Lapangap, ki la phet krad bad phet ïam rem la kum kito kiba shah beh ha kaei kaei re kaba i ngiew. Hato kane kadei ka rukom treikam jong ki Pulit ban phet na jaka kaba kidei ban ïada ïa u pud u sam?
Khlem pep kane ka jingleh ki Pulit kan pynduh jingshaniah ïa ki ha ki paiidbah. Nangta ka sorkar jylla ruh kadei ban jubab, ba, balei ha ki jaka khappud ba don ka jingïakynad kam ju phah bun ki Pulit ne ban phah ruh ryngkat ki tiar ialeh kiba biang, katba ha ka Public Hearing na ka bynta ki Kompeni pynmih dewbilat la pynmih da ki phew ngut ki Pulit ryngkat ki tiar ïaleh kiba biang.
Kane ki ka la ïahap bad ka jingong kiba bun ba “Ki Pulit ki long kum ki Khnai ha Khappud bad ki Khla ha jaka la jong”.
