Mawkyrwat, ‘Nailar 28: Ka Khasi Students Union (KSU) jong ka Mawkyrwat Circle ka la ïoh ban plie pyrda ïa ka lympung ïalehkai kynjatbol ba la tip kum ka “1st Maitshaphrang Under-16 Football League 2023” ha madan Artificial Turf, MDSA, Mawkyrwat, South West Khasi Hills District ha kaba u bah Hamlet Dohling u nongaibuit jong u Chief Minister u la long kum u kongsan bad ka phang ka long, “Hooid ïa ka Sports; Rai-maw Rai-ding ngin kiar ban ong ‘Em’ ïa u Drugs”.
Ka jingïalehkai sdang ha kane ka sngi ka long hapdeng ka Umjaraiñ Hot spring Sports Club bad ka Mawpait Football Club (Rangthong) ha kaba ha kane ka jingïalehkai hapoh kim shem la ïoh ban thep ïa ki kol ki jong ki watla bunsien ki la pyrshang ban thep ïa ki kol ki jong bad haduh ba kut ka jingïalehkai, baroh ar tylli ki kynhun kim shem lah ban thep wat kawei da kaba ki la ïa khaid mar 0 kol. Haba kren ha ka jingïalang, u bah Hamlet Dohling uba dei u kum u nongaibuit jong u Chief Minister bad kum u General Secretary barim jong ka Khasi Students Union Central Body u la ong ba, “ka jingpoi ban rung kum u dkhot ka KSU ka dei lyngba ba u ieid ïa ki kam ïalehkai kynjatbol da kaba u la leit ïa shimbynta ha ka lympung ïalehkai kynjatbol ba la pynlong da ka KSU ha ki snem 1993 hapoh Madan Students, Shillong bad nangne u la sdang ban rung dkhot bad ban trei ïa shibun ki kam na ka bynta ka jaidbynriew kum u dkhot jong ka KSU.
Shuh shuh ha ka jingkren jong u, u la pynpaw ka jingsngewnguh ïa ka KSU Mawkyrwat Circle ba ka la pynlong ïa kine ki lympung ïalehkai khamtam ban buh ïa ka thong ban ong “Em ïa u Drug” namar ka KSU ka dei kata ma ka ka seng kaba peit ïa ka bha ka miat bad ruh ïa ki jingeh kiba ktah ïa ka jaidbynriew ban ruh ban peit ïa ka jingbit jingbiang jong ki khynnah bad ki samla pule bad ruh ha kaba ïa dei ban kyntiew ïa ki samla ha ki kam ïalehkai ha kylleng ki jaka.
Namarkata, u la kitbok kit rwiang ïa ka seng bad ïa ki khynnah kiba la ïoh ban ïa shimbynta ha kane ka lympung ïalehkai kynjatbol ba kin lah ban sei ia ki sap ki jongki da ka jing trei shitom namar ba ha kum kine ki juk mynta ki kam ialehkai sport kam dei shuh tang ka kam ban ïalehkai sngew tynnad kum ha por ba la dep hynrei ka dei ruh kawei ka lad ban ïoh kam ïoh jam bad ruh ban lait na shibun ki jingmlien kiba sniew.
Ïa ka jingïalang ba lyngkot la pynïaid da u bah Renolricky Iawphñiaw, Sports Secretary KSU Mawkyrwat Circle, bad bud sa ki jingkren lyngkot na u bah Forwardman Nongrem, President KSU South West Khasi Hills District, u bah Damang Syngkon, District Sports Officer, South West Khasi Hills District ha ryngkat da ka jingsakhie lang ki paidbah bad ki katto katne ki dkhot jong ka KSU.
