Kitbok ka skul ïewrynghep ïa ka Larihun & Saphinia kiba la shah jied ha ka kynhun U-14 ka Meghalaya

Shillong, Nailar 28: Ka Iewrynghep Secondary School, Mawñianglah, Upper Shillong ka la dap da ka jingsngew sarong hadien ba ki la don ar ngut ki thei kynjatbol na kane ka skul kiba la shah jied ban mih madan na ka kynhun lehkai Under-14 jong ka Meghalaya.
Kine ki ar ngut ki kynthup ïa ka Larihun Songthiang, khun jong i Kong Phirinda Songthiang bad u Bah Karbinstone Nongrum, i ba pule ha ka Class – VIII, bad i wei i dei i Saphinia Nongkhlaw, khun jong i Kong Estilia Nongkhlaw bad u Bah Mohun Sohtun, i ba pule ha ka Class -VI.
Na ka liang jong ka skul ka la kitbok kitrwiang ïa kine arngut, kata ka Larihun Songthiang (Winger) ryngkat bad ka Saphinia Nongkhlaw (Goalkeeper) kiba mih kyrteng ha ka thup jong ka kynhun Meghlaya U-14 Girls ki ban sa aireng ha ka Sub Junior National Footbal Championship ka ban long ha Punjab.
Ka kynhun ïalehkai jong ka jylla kan sa mih mynta ka sngi, ka 29 tarik Nailar, 2023 na ka bynta kane ka lympung.