Sdang ka lehñiam ‘Sohjer’ ba 4 sngi ka Raid Marwet ha Baridua, ka jingainguh ba shisien shisnem
Nongpoh, Kyllalyngkot 17: Kumba la buh naduh mynbarim, ki longshuwa manshuwa ban pyndep ïaka ñiam ka rukom, ka kñia ka khriam, ka Marwet Sohjer Committee kumba ju leh man u snem kala sdang biang ïaka jinglehñiam Sohjer ba 4 sngi lynter hadien 3 snem bala pynsangeh noh naka jingwan lyngshop jong ka khlam Covid-19 bala pynlong ha madan Baridua.
Ïa katei ka lehñiam Sohjer la wan ban plie pyrda noh da u Bah Victor Rani MDC ka Nongpoh kum u kongsan haka jingdonlang u Paiem Ken Syiem, Syiem ka Raid Marwet, ki longsan man san jong ka Raid bad kiwei kiwei ki riew rangbah.
Katei ka jinglehñiam ka dei kaba ju leh shisien shisnem da ki khun ki hajar jong ka Raid Marwet ban ainguh aidem ïa u Blei nongbuh nongthaw, ba un kyrkhu kyrdoh ïaki khun ki hajar baroh shisnem khamtam hadien ka jingioh kheit ïa u soh ba nyngkong jong ka jingtrei shitom jong ki baroh shisnem, khamtam ban pynim ïaka kolshor tynrai bala buh naduh u mynbarim.
Haba kren sha ki lad pathai khubor naka liang u Paiem Ken Syiem, Syiem ka Raid Marwet u la pynpaw ba mynta ka sngi ka dei tang ka dak ka jingplie ïa katei ka lehñiam bad ka tamasa bad ïaka kñia ka khriam yn sa leh bad pyndep haka 19 tarik mynta u bnai kaba dei ka sngi ba 3 jong katei ka lehñiam ha kaba 75 tylli ki shnong jong ka Raid Marwet kin wan ban shim bynta ha katei ka sngi.
Shuh shuh u la ong ruh ba lyngba katei ka lehñiam bad ka tamasa lah ban sakhi ïaka jingriew spah jong ka kolshor tynrai jong ka Raid Marwet bad lyngba katei ka lehñiam yn sa lah ban pynim biang ïaki shad tynrai, ki bam tynrai bad ka kñia ka khriam kumba la buh da ki longshuwa manshuwa
bad ainguh ïa u Blei Nongbuh nongthaw ba un theh ki jingkyrkhuh ïaki khun ki hajar jong ka Raid Marwet bad khamtam ban pynim ïaki riti ki dustur bala buh naduh u mynbarim ba khun ki hajar jong ka Raid jong ka Raid kim dei ban klet lane kim dei ban duh bam dam noh hynrei ban pynneh pateng la pateng.
Ha kane ka sngi sdang la pynlong ruh ki prokram bapher bapher kum ka Football, Jingkyntip Ktien, ki jingïakop dro bad kiwei kiwei.