ïoh kurup ki Pulit ka East Jaintia kumba laiphew tylli ki synduk kot ba thep ïa ki tiar pynbthei na Jalaphet Bri-Sumer

Khliehriat Kyllalyngkot 16: Hadien ba ïoh ïa ka jingtip ba paka na ki thymmei ai jingtip, ki pulit jong ka East Jaiñtia Hills District hapoh ka jingïalam u Additional Superintendent of Police, u bah Banraplang Jyrwa, MPS hynnin ka sngi ki la leit sha shnong Jalapher Bri-Sumer ki la buddien bniah bad ha ka por mynmiet ki la rung ha kawei ka sem masi bad ki la lap saw ngut ki briew bad ki la lap ruh bun tylli ki synduk kot (carton boxes) ba la buh hangta hapoh sem bad hapoh kine ki synduk (carton) ki don bun bah ki tiar pynbthei, kumta ki pulit ki la ïoh ban kurup haduh laiphew tylli ki synduk kot kiba thep ïa ki tiar pynbthei bad ïa ki saw ngut kiba don ha kata ka sem masi ki pulit ki la kem noh ïa ki.
Ki khubor pulit ki ïathuh ba hapoh ki ar phew hynriew tylli ki synduk kot (carton box) la thep ïa ki tiar pynbthei ba la tip kum ki Galatin sticks kiba khiah haduh 650 kilo bad hapoh ki saw tylli ki carton pat la thep ïa ki 200 tylli ki bom electrict detonators, ki pulit ki la kurup noh ïa ki tiar pynbthei lem bad saw tylli ki mobile phone.
Kitei ki saw ngut kiba la kem noh da ki pulit ki dei kiba la tip kyrteng kum u Point Chyrmang, 30 snem kyrta, u Nikalai Chyrmang, 21 snem kyrta, u Mij Chyrmang, 22 snem kyrta bad u Shanbor Chyrmang, 22 snem kyrta kiba dei na ka shnong Jalaphet Bri-Sumer, la register ia ka ejahar ha Saipung Police Station (case No.2(1)2023 bad la pynngat ia ki hapoh ki kyndon ain 120B IPC R/W Sec 5 ES Act bad ka jingtohkit ka dang iaid.
Katkum ka jingïathuh u Superintendent of Police East Jaiñtia Hills District, u Jagpal Singh Dhanoa, IPS la ong ba ki thymmei ai khubor jong ki pulit ki la ïohi ba ki don lai ngut bad saw ngut ki samla kiba la i suba sniew ba ki ïaid shapoh ki jaka khlaw ha shnong Jalaphet Bri-Sumer kiba kit ïa ki synduk kot (carton box) bad rung shapoh khlaw, kumta ki pulit ki la shim khia mar mar halor kane namar ba ka la jan dei ruh ka por election jong ka Meghalaya Legeslative Assembly 2023 ban dup wanrah ïa ka suk ka saiñ bad na ka liang ki pulit ruh ki la suba jur ba ki don ki tiar aiu re aiu hapoh ki synduk kot (carton box) kiba lah ban buh jingma khamtam ha kum kane ka por election, kumta ka kynhun jong ki pulit ba kynthup u Additional Superintendent of Police, u bah Banraplang Jyrwa, MPS, u Sub Inspector Uba dei u Incharge jong ka Umpleng Anti Dacoity Camp, u bah K.Pdahsiej, , u Sub Inspector jong ka Saipung Police, u bah B.Marbaniang lem bad ka kynhun pulit ha ka por ba la miet bha ki la leit ban tur bad rung sha ka jaka khlaw bad rung hapoh ka sem masi kaba don ha kata ka khlaw bad ki la lap ïa kitei ki saw ngut ki samla kiba iohthiah hapoh sem masi kumta ki la kyrsiew ïa ki bad kin sa pynlong ïa ka jingkhynra bad kin sa lap ïa kitei ki synduk kot ba la thep ïa kitei ki tiar pynbthei.