Jop ki samla ïa ka eksam kam sorkar lyngba ka jingïarap u FILO App, pynkup burom u DC Ri-Bhoi

Nongpoh, Naiwieng 04: Kumba 8 ngut ki samla na Ri-Bhoi mynta ka sngi kila shah pynkup burom ha ka ophis u Deputy Commissioner ka Ri-Bhoi District hadien ba kila pass ïaki eksam bapher bapher haka kam sorkar lyngba ka jingïarap u FILO App haka por ba ki pynkhreh ban ïakhun ïaki eksam kaba dei shibynta jong ka project ASPIRE bala mang kyrpang tang naka bynta ki samla pule ka Ri-Bhoi District khlem kano kano ka jingsiew.
Kumban shu pynkynmaw bala shna kyrpang ïa u FILO App ban ïarap ïa ki samla pule ha Ri Bhoi District. Kane ka app kan ai jingïarap 24 kynta ïa ki khynnah skul naduh klas 9 haduh klas 12 lyngba ki notes, bad kiwei ki jingdonkam ba ïadei bad ka jingpule.
Nalor kata, ka FILO App kan long ruh ka jingïarap kaba kongsan ïa kito ki samla kiba la dep ïa ka klas 12, ha kaba kin ïoh jingïarap ban pynkhreh ïa ki eksamin bad ban wad kam, la ka long ha ki kam sorkar jylla ne sorkar pdeng ha kaba ki samla na Ri-Bhoi kim donkam ban siew eiei haba ki register hadien ba ka bor district kala shim ïaka sienjam ban pynmih ïa utei u App haka jingïatreilang bad ka FILO bad bei tyngka da ka NITI Aayog.
Ka long ruh ka jingsarong ba dei naka jingïarap une u App kala long shisha ka jingkyrkhu ïaki khun samla bad mynta ka sngi naka liang u Dr Abhishek Saini Deputy Commissioner u la pynkup burom ïa kumba 8 ngut ki samla kiba la pass ïaka eksam kam sorkar bapher bapher haka jingdonlang u Rohit Kumar Director bad Co-Founder FILO ryngkat kitei ki samla.
Haba kren sha ki lad pathai khubor naka liang u Dr Abhishek Saini Deputy Commissioner ka Ri-Bhoi u la ong ba ka sorkar ka don ïaka thong ba wat ki khynnah haki thaiñ nongkyndong kim dei ban shah ieh bad kin ioh kajuh ka jinghikai bad lyngba kane ka project ASPIRE ki khynnah ki lah ban ioh ka jinghikai kaba paka haba ïadei bad ka pule ka puthi kumba ioh ki khynnah kiba sah haki jaka sor, bad kaba sngewtynnad ka long ba kane ka prokram ka long kaba seisoh haka jingïatreilang bad ka FILO.
U la ong ruh ba lyngba u App FILO kan long shisha ka jingïarap ïaki khynnah ha kaba kino kino ki khynnah ki lah ban ioh jingïarap 24 kynta haki sobjek bapher bapher bad kumjuh ruh ka jingïarap naka bynta kiba pynkhreh ban ïakhun ïaki kam sorkar naka bynta kiba la pyndep ïaka klas XII bad kaba sngewtynnad ka long kumba 24 ngut ki samla kila pass ïaki eksam bapher bapher kum ka SSC, MTET, Constable bad kane ka long tang ka jingsdang bad khmih lynti ba kin dang bun kiba pass ha ki por ban wan.
U Dr. Saini u la ïathuh ruh ba ki don kumba 7 hajar ngut ki samla kiba la register ha une u App bad kumba 5 hajar ngut ki dei kiba la shim bynta shitrhem ban ioh jingïarap.