Ngim kyntiew ïa kano kano ka niam hynrei ngi kyrshan ïa ki briew ha ka jingrakhe: Conrad

Shillong, Naiwieng 4: U Myntri Rangbah ka Jylla u la kren shaphang ka aiom lehkmen bad ka rukom treikam jong ka Sorkar ban kyrshan ïa ki jingrakhe jong ki paidbah.
Ïa kane u la pynpaw haba kren ha ka jingialang ba plie paidbah ïa ka ophis DSEO ha ryngkat bad ïa ki ar tylli ki jaka pynieng kali ha Mawkhar bad Motphran.
“Ha kane ka aiom lehkmen ngi don ïa ka Cherry Blossom Festival, LitFest, Gospel Concert.Nga la ïoh pdiang ïa ki khubor ba kylli balei ka Sorkar ka kyrshan ïa ki Gospel Concert.Nga la ong ïa ki – ha ka constituency jong nga ngi don ïa ka Chhat Puja ba la 100 snem ba la rakhe bad nga ai pisa na ka bynta kata.Ngim don hangne ban kyntiew ia kano kano ka niam.Ngi don hangne ban kyrshan ïa ki briew jong ngi bad ban long shi bynta jong ki jingrakhe jong ki,” u la ong.
U la ong ba la ka long ïa ka Balang Presbyterian, ka Balang Baptist, ka Bihari community na ka bynta ka Chhath Puja, lane ki committee Durga Puja, ka Sorkar ka ai jingkyrshan ïa baroh mar katjuh.
“Kumta ngi rakhe ïa ka kolshor jong ka jaitbynriew jong ngi, da kaba pynthikna ba ïa ka lad kaba mar kumjuh bad ka jingburom kaba ïa ryngkat la ai ïa baroh ki jingngeit bad baroh ki niam”, u la ong.
U Myntri Rangbah ka Jylla ula ong ba ha u snem ban wan ka Meghalaya kan pynlong ïa ka National Games – lehse ka jingïalehkai kaba heh tam ba ka Jylla ka la pynlong ha kine ki 54 snem. Ka Indian Olympic Association’s organising committee ka dang don mynta ha Shillong ban bishar bniah ïa ka jingpynkhreh.
“Kane kam dei tang ka jingïalehkai tang jong ka Sorkar, hynrei ka dei ka jingïalehkai jong ka Jylla Meghalaya.Man la u nongshong shnong u don ka bynta ban leh.Wat lada phi phuh samrkhie bad pdiang burom ïa ki nongwan jngohkai jong ngi da ka mynsiem kaba sngewkmen, kata ka dei ka jingnoh synñiang jong phi.Ka jingsumar ïa ki nongïalehkai bad pynlong ïa ki ban sngew kumba ki don ha ïing – kata ka dei ka jingkmen jong ka kolshor bad ka jingpdiang sngewbha jong ngi,” u la ong.