Sam khusnam ka SSSSSUZS ïa ki samla bad ki nonghikai kiba wanrah burom ïa ka thaiñ

Mawkyrwat, Risaw, 30: Ka Synjuk ki Seng Samla Shnong Shiliang Um Zone Sepngi (SSSSSUZS) kum ka dak jong ka jingai-mynsiem bad jingpynshlur shuh shuh na ka bynta ki samla bad kumjuh ki nonghikai kiba la wanrah ka nam ka burom ïa ka dong ka thaiñ, ki la ïoh ban pynlong da kawei na ki prokram leh burom kyrpang na ka bynta jong ki.
Ïa ki khusnam ba kum ka Synjuk ki Seng Samla Shnong Shiliang Um Zone Sepngi (SSSSSUZS) ka la ïoh ban sam sha ki 3 ngut ki ‘riew ïalahkai kiba la wanrah burom ïa ka dong ka thaiñ bad ïa ka ïing ka sem kynthup ruh ïa u samla Commandar Shangpliang uba long u President jong ka Meghalaya Filmmaker ha kajuh ka por kum u nongïalam jong Hill Farmer’s Union (HFU) u ba la wanrah burom ïa ka dong ka thaiñ jong ka South West Khasi Hills District kumjuh ruh ïa ka jylla hi baroh kawei.
Ha kajuh hi ka sngi, ka Synjuk ki Seng Samla Shnong Shiliang Um Zone Sepngi (SSSSSUZS) mynta ka kynti ha ka sien kaba ar ka la ïoh ban pynlong ïa ka jingïalehkai kynjatbol ba la tip kum ka ‘Knockout Football Tournament 2022’ kaba long tang ar sngi kata ha ka 28 bad 29 tarik Risaw, 2022 bab ba la pynlong ha ka shnong Mawthawpdah. Kane ka lympung ïalehkai ka don ha ka ïa ka phang pdeng kaba ong, “Ong Em ïa U Drugs”.
Ïa kane ka lympung ïalehkai kynjatbol ba la tip kum ka ‘Knockout Football Tournament 2022’ la plie pyrda da u bah Sounder Strong Cajee u ba long u kongsan ha ryngkat ka jingïadonlang u bah Commandar Shangpliang, u Wallambok Nongsiej, Chairman ka Synjuk ki Seng Samla Shnong Shiliang Um Zone Sepngi (SSSSSUZS), u bah M. Lyngdoh, Secretary ka Synjuk ki Seng Samla Shnong Shiliang Um Zone Sepngi (SSSSSUZS) lem ruh bad kiwei kiwei de ki ‘riew rangbah.