Ki don 1,510 ngut ki nongthep vote kiba la lap ba kim lah ban ïoh ïa ka Final Electoral Roll: CEO Tiwari

Shillong, Risaw 06: U heh ophisar ka tnad elekshon ka jylla Meghalaya u Dr. B.D.R. U Tiwari, IAS, u la pynlong ïa ka jingïalang bishar bniah (virtual review meeting) bad ki Deputy Commissioner/District Election Officer (DCs/DEOs), ki Ophisar Pynrung kyrteng Election (EROs), ki Assistant Ophisar Pynrung kyrteng Elekshon (AEROs) bad kiwei kiwei ki ophisar elekshon ban bishar bniah ïa ka jingïaid shaphrang jong ka State IRS 2026 ha kylleng ka jylla.
U CEO u la pynlong ruh ïa ka jingïalang ba man ka por bad ki nongmihkhmat jong ki Seng Saiñpyrthei ba la ithuh jong ka ri bad ka jylla, ha kaba la ïakren ïa ka jingïaid lynti kaba thymmai jong ka SIR 2026, ka jinglong jong ki jingpynbna bad jingbishar ïa ki mukotduma, bad ki lad pynsuk ïa ki nongthep vote ba dang shen ba la wanrah da ka tnad elekshon jong ka ri India.
U la ïathuh ba la palat 94% na ki jingpynbna case la pyndep. U CEO u la ïathuh ba katkum ka jingkheiñ SIR kaba dang shen, na ki 21,69,243 ngut ki nongthep vote ha ka Draft Electoral Roll, la pynmih 6,51,735 tylli ki jingpynbna. Na kine, ki notis kiba la dep ban pynpoi ki long 6,51,391 tylli, ha kaba tang 344 tylli ki notis kiba dang ap ban pynpoi.
Baroh ki mukotduma ki la dep bishar ki long 6,13,512 tylli, kaba long 94.14% na ki jingpynbna ba la pynmih. Haduh mynta, ki don 1,510 ngut ki nongthep vote kiba la lap ba kim lah ban ïoh ïa ka Final Electoral Roll hadien ka rukom ba la buh, katba 19,96,297 ngut ki nongthep vote kiba la monlang ban ïoh ïa ka Final Publication.
Na ki jingpynbna baroh kiba la pynmih, 2,22,786 tylli ki dei kiba ïadei bad ki nongjied hapoh ka kyrdan Number Mapping, katba 4,28,949 tylli ki dei kiba ïadei bad ki mukotduma kiba ïadei bad ka jingbym ïahap ha ka map.
U CEO u la bthah ïa ki nongtrei elekshon ban pynleit jingmut ha ki mukotduma kiba dangsah bad ban pynthikna ba uwei pa uwei u nongjied uba dei hok un ïoh ïa ka lad kaba biang katkum ka rukom treikam ba la buh.
U la pynpaw ruh ba ki BLO kin leit jngoh ïa ki ïing ki sem ban lum ïa ki kot ki sla. U CEO u la pynkynmaw biang ïa ki jingbthah ba ïadei bad ki nongthep vote ba la pynmih da ka tnad elekshon jong ka ri India lyngba ka Press Note No. ECI/PN/120/2026 ka 26 tarik u Nailur, 2026.
Ki nongjied kiba la shah pynbna namar ba kim don map ne ki don ki jingbym ïahap jingmut kim donkam ban leit sha ka ophis jong ka ERO/AERO man ka por. U BLO uba dei peit un leit jngoh ïa ka ïing jong u nongjied, un lum ïa ki kot ki sla kiba donkam bad un buh ha ka ECI Net ban rai da ka ERO.
U la ong ba tang ha ki jingjia ba kyrpang, kumba la rai da ka ERO, yn donkam ban bishar, bad kum kane ka jingbishar dei ban pynlong online. Ha kaba donkam, u nongjied u lah ruh ban ai bor ïa uno uno u dkhot ba la san jong ka ïing ban wan sha ka jingbishar na ka bynta jong u.
La bthah ruh ïa ki DEO ba kin thaw ïa ki Help Desk/Special Camp kiba biang ban pynsuk ïa ki briew kiba sah ha ki jaka sah miet, ki nongbylla, ki briew kiba duna ha ka ïoh ka kot, ki briew kiba khlem ïing khlem sem bad kiwei kiwei kiba donkam jingïarap.
U la ïathuh ba kumba 23,259 tylli ki phorm ba la pdiang bad la pynkylla digital. Haduh mynta, la pdiang bad digitise haduh 23,259 tylli ha baroh kawei ka Jylla, kiba kynthup ïa 12,624 tylli ki Form 6 kiba aply, kumba 1,616 tylli ki Form ha ka 7, bad 1,590 tylli ha ka Form 8 ban pynkynriah ne shift bad 7,429 tylli ki Form 8 ban pynbeit.
U CEO u la pynksan ïa ka jingpeit bniah bad jingpynbeit ïa ki aplikeshon ha ka por kaba biang katkum ka rukom treikam ba la buh.
U la ïathuh ba ki Seng Saiñ pyrthei kiba ïashim bynta lyngba ki 1,814 tylli ki BLA. La ïakren ruh halor ka jingïashim bynta jong ki sengbhalang lyngba ki Booth Level Agent (BLA). Ki Seng Saiñpyrthei kiba la ithuh bad ki Seng Saiñ pyrthei jong ka Jylla ki la thung haduh 1,814 ngut ki BLA ha baroh kawei ka Jylla – 736 ka NPP, 186 ka INC, 121 ka UDP, 320 ka VPP, 393 ka BJP bad 58 ka AITC.
Ha kane ka jingïakynduh bad ki seng saiñ pyrthei, la kyrpad ïa ki nongmihkhmat jong ki ban bteng ban pynïar ïa ka jingïatreilang lyngba ki BLA jong ki bad ban ïarap ban pynphriang ïa ki jingtip kiba thikna ha kaba ïadei bad ka SIR bad ki lad pynsuk kiba thymmai kiba lah ban ïoh da ki nongjied.
Ka jingpynmih kaba khatduh ha ka 26 tarik u Risaw, 2026. Katkum ka por ba la pynthymmai ba la pyntip da ka tnad elekshon jong ka ri India, la buh ban pynmih ïa ka Final Electoral Roll ha Meghalaya ha ka 26 tarik u Risaw, 2026.
U CEO u la kyntu ïa kiba trei elekshon ban pyndonkam ïa ka por kaba dang sah ban leit sha ki nongjied kiba donkti bad ban pynthikna ba baroh ki mukotduma kiba dang sahteng kin shah pynbeit bha bad katkum ki jingbthah jong ka Commission.
La kyrpad ïa ki nongjied kiba la ïakynduh da ki BLO jong ki ban ïatreilang bad ban pynbiang ïa ki kot ki sla kiba donkam. Hadien ka Final Publication la bthah ïa uwei pa uwei u nongthep vote ban peit bad pynthikna ba ka kyrteng jong u/ka ka paw ha ka Final Electoral Roll.