Ym shym don ka jingïakren ban pynrung myntri thymmai ha ka sorkar MDA II – Pynshai u CM

Shillong, Risaw 6: U Myntri Rangbah ka jylla u Conrad K Sangma u la ong ba wat lada ki phra ngut ki MLA jong ka United Democratic Party (UDP) kila leit ban pynïasoh sha ka Bharatiya Janata Party (BJP) kam shym pat la don satia ka jingïakren ban pynrung ha ka kynhun myntri sorkar.
Tang shu tip ba kine ki phra ngut ki MLA ka UDP kiba leit sha ka BJP kila don shibun ki jingïarken hangne hangtai ba kan don beit ka jingpynkylla hapoh ka kynhun myntri sorkar.
Haba pyntip sha ki lad pathai khubor u Conrad K Sangma u la ong,”Ym shym la don ka jingïakren naduh ba sdang bad kam shym don ka jingïakren wat hapdeng ruh bad ruh wat hadien ba kila dep ban pynïasoh sha ka BJP kam don satia ka jingïakren ban bujli myntri sorkar”.
Halor ka khubor hamsaïa ba la saphriang bha ha ki rynsan social media ba ki MLA ka NPP ki lah ban leit ïasoh sha ka BJP, u Conrad K Sangma u la ong, Ngi kum ki nongthaw aiñ ngi ju ïakynduh man ka por ha kaba ngi pyntikna bad pynshai halor ki mat kiba don ha ka jingsynshar bad lada don ki mat ba ki MLA ki don bad ka ju long ban don ka PP meeting ban ïa kren bad ki MLA.
“Hooid mynta ka sngi don ka jingialang bad baroh ki MLA ka NPP ki don lang baroh bad kam shym la don ka mat kaba khraw bad kine ki dei tang ki jingmutdur kaba ki paidbah ki shu antad bad ki shu poi beit sha ka rai bad pyrshang ban mutdur ha ki rukom kiba bun” ong u Conrad.
Shuh shuh u Conrad u la ong, “Kine kim dei eiei hynrei kidei tang ki jingkhein bad hynrei ka dei tang ka jingmutdur jong ki kato katne bad kadei ba la pynmih na ki lad pathai khubor hynrei ngan pyntikna ba ki MLA bad ki kynhun ba ïa trei lang bad kumjuh ruh ïa ki paidbah ba kam shym la don kum kata ka jingthmu bad ka jingmut”.
U Conrad K Sangma u la pynskhem ruh ba ka sorkar MDA II ba la ïalam da ka NPP ka dang skhem beit triang.
“Shisha, ka sorkar MDA-II ka long kaba skhem bha.Ka NPP hi dalade ka don 33 ngut ki MLA kiba long kiba ym don jingthut bad ngi don ruh ïa ki paralok ba synrop bad ngi”, u la ong.
U la ong ba ka jingkhlain ha baroh kawei ka kynhun synrop ka dang sah kumjuh wat hapdeng ki jingkylla ha ka jinglong hapdeng ki paralok.
“Ka jinglong baroh kawei ka la dei ban kylla hapdeng ki paralok hynrei ka jingkhlain jong ka MDA ka dang sah kumjuh bad ka jingkular kaba don hangta na ki paralok bapher bapher ka dang sah kumjuh bad kumta ki la don ki jingeh hapdeng arngut ki paralok ba iatreilang kiba dei ki kam hapoh jong ki ar tylli ki party hynrei kata kam shym la ktah satia ia ka kynhun baroh kawei ne ïa ka jingshngain jong ka sorkar MDA” u la ong.