Hadien 5 snem ïoh lad biang ki samla ka Balang Katholik ha ka jingïakynduhlang ka NERYC

0

Shillong, Risaw, 30: Ki khun samla jong ka Balang Katholik na ki 15 tylli ki Dioceses hapoh ka jylla Shatei Lammihngi jong ka Ri-India dang shen ki la iakynduh lang ha ka lympungbah ba la pynlong da ka North Eastern Regional Youth Commission (NERYC) kata hadien 5 snem.
U Vice President jong ka NERYC Nongstoiñ Diocese u Samla Onessimos Shangdiar u la iathuh ba kane ka lympungbah ka la long ha ka jylla Manipur ha Canchipur Katholik School, Imphal bad kumba 2300 hajar ngut eiei ki Delegate na ki jylla bapher bapher ki la ïa shimbynta shitrhem bha naduh basdang haduh ban dakut ka prokram.
La plie pyrda ïa kane ka lympung jingïakynduh lang ki khun samla Katholic da u u MLA jong ka Ukhrul Constituency u Ramnganing Muivah uba la long u Kongsan bad u Additional Chief Secretary (TA & Hills/AR DG/SAT) u Letkhogin Haokip uba la long kum u symbud kongsan ha ryngkat ka jingïadonlang jong ki nongmihkhmat jong ka Sorkar Manipur, u Archbishop jong ka Jyllaniam Imphal u Most. Rev Dominic Lumon, ki nongïalam jong ki samla na ki Diocese bapher bapher ha ki jylla jong ki kum ka Arunachal Pradesh, Assam, Manipur, Meghalaya, Nagaland, Mizoram bad Tripura.
La pynshit pynshngaiñ ïa katei ka program da ki musical concert ba la rwai da ka kynhun jong u Jimmy Thang bad ka kynhun ba ki khot ka “Traffic band.” La don ruh ka jingïapyni riam tynrai na ki jylla jong ka thaiñ Shatei Lammihngi kum ban pynneh pynsah bad pynroi ïa ki riti dustur.
Ki khun samla ki la ïashimbynta shitrhem wat hapdeng ka jingpynthuh jong u slap bad ka lyer na kadaw ka cyclone Sitrang. Kane ka jingpynthut jong ka bor mariang kam shym la khanglad ïa ki khunsamla ban bteng ïa ki prokram bapher bapher.
Ha ka sngi la don ruh ki jingkren halor katto katne ki phang ba ïadei bad ka imlang sahlang ki khun samla, kum ka “Indian Youth Movement” ba la ai jingbatai ba bniah da u National Youth Director jong ka ICYM u Fr. Chetan Machado bad u Jimmy Thang u nongrwai ba pawnam jong ka jylla Manipur uba la rwai ia ka jingrwai “God gave the song.”
Ka don ruh ka jingïakren halor ka phang, “Entrepreneurship in North East India” ba la batai bniah bad pyni lynti da u Ranjan Baruah u ba dei u Career Mentor bad Skill Trainer napoh ka jylla Assam.
Haba ïadei bad ka koit ka khiah, la shim ïa ka bynta jong ka Mental Health ne ka jingkoit jingkhiah ha kaba ïadei bad ki bor pyrkhat da ka jingiathir bad ba la batai bniah da u Dr. R.K. Lenin Singh uba dei u Professor bad HoD jong ka Psychiatry Department RIMS, uba long ruh u doktor uba la pyntbit bha ialade ha ka Mental Health bad Sexual Health.
Ka don ruh ka jingiathir halor ka phang pdeng “Love and Relationship” da u Fr. (Dr) Linus Neli. Baroh kitei ki phang ba la pynbeit ki la ai jinghikai shibun eh ïa ki khunsamla jong ka Thaiñ Shatei Lammihngi.
Ha kane ka sngi, la pynkup burom bad ai khusnam ïa ki khunsamla kiba la lehbha ha ka Balang bad ka imlang sahlang jong baroh ki jylla ka thaiñ Shatei Lammihngi.
La pynkut noh ïa kane ka lympungbah da ka jingpynhiar ïa ka lama da u Chairman jong ka North Eastern Regional Youth Commission (NERYC) u Most Rev. George Palliparambil bad la aiti ïa kalama ha u Fr. John Barman, MSFS, Regional Youth Director.
Ka Indian Catholic Youth Movement North East (ICYM-NE) hapoh ka shatri jong ka North Eastern Regional Youth Commission (NERYC) ba la ïalam da ki Riewniam kynthei bad shynrang ka ai khublei shihajar nguh ïa ki nongïarap ba la noh synñiang ha kiba bun ki bynta met bad mynsiem ban pynlong ïa kane ka jingïakynduh lang kaba jop bad ba seisoh jong ki samla ka Balang Katholik ha ka thaiñ Shatei Lam-mihngi.

Leave A Reply

Your email address will not be published.