“Ngam shym la shong kli-kti; ka surok Wahkaji-Phlangdiloiñ sha Ranikor kan sa urlong”: Pius Marweiñ

Mawkyrwat, Risaw 02: U Bah Pius Marweiñ, MLA/MDC jong ka Ranikor Constituency, u la pynshai ba ka sorkar kam shym la klet ïa ka surok Wahkaji-Phlangdiloiñ sha Ranikor, bad u la kular ba kane ka surok kan sa urlong, hynrei u la kyntu ïa ki paidbah ban long kiba ïai shah bad ïai ap ïa ka jingpyntrei, namar ka dei ka projek kaba heh kaba don ka jinglut kaba palat T. 200 klur.
Ka surok Wahkaji-Phlangdiloiñ ka ban poi sha Ranikor ka long kaba kongsan bha ïa ki paidbah jong kane ka thaiñ, namar kan pynjan bad pynsuk ïa ka jingïaid lynti sha ki ophis sorkar bapher bapher kiba don ha Ranikor, kynthup ïa ka Block Development Office, Civil Sub-Division bad kiwei kiwei ki tnat sorkar. Hynrei, haduh mynta, ki paidbah ki dang hap ban ïaid lyngba ka Mawkyrwat – Nongnah ban poi sha Ranikor.
U bah Pius Marweiñ u la kren ïa kane, ha ka jingïalang pynkup burom ïa ki phra (8) tylli ki shnong bad aiti ïa ka jinglong trai ïa ka um, kaba la pynlong da ka PHE Mawkyrwat Division ha Shnong Wahkaji.
U la ïathuh ruh ba hapoh u bnai Nohprah jong u snem 2025, ka Sorkar Jylla ka la mang bad pyntreikam ïa ki skhim kiba kot sha ka jinglut kaba palat T. 600 klur hapoh ka Ranikor Constituency. Ki projek kiba kynthup ha kine ki skhim ki long ka surok Phlangwanbroi -Ranikor bad ka surok Nongjri – Maweit ha kaba ka jingtrei ïa kine ka la ïaid shakhmat.
Ha kane ka sngi, u Bah Phailand Lyngdoh, Sordar Shnong Wahkaji u la ai jingïaroh ïa u Bah Pius Marweiñ, MLA/MDC jong ka Ranikor Constituency, halor ka jingdon ryngkat bad ka jingpoi ban ïa kynduh ïa ki paidbah man ka por haba ki donkam ïa u.