Nongstoiñ, Risaw, 30: Ka Khasi Students Union Rambrai Circle ha ka 29 tarik mynta u bnai, ka la ïoh ban pynlong ïa ka jingsam khusnam lane Maitshaphrang Award kaba ar jong ka seng, sha ki 10 ngut ki samla pule kiba la wan shakhmat ha ka eksamin SSLC 2022.
Ïa kane ka jingsam khusnam la pynlong ha Vani Hall St John Bosco Secondary School, Nongkroh Rambrai bad ïa katei ka jingïalang ha katei ka sngi la pynïaid da u Samla Dankobartis Nongphud General Secretary KSU Rambrai Circle.
Ha katei ka lynpung jingïalang, la ïoh ban ïadon ryngkat ban pynshngaiñ naduh ki Nonghikai, ki khynnah skul jong ki saw tylli ki skul ki hap hapoh jong ka Rambrai, u Rev Fr. John Kharshandi, u Syiem ka Hima Rambrai ha ryngkat ki Nongïalam jong ka KSU West Khasi Hills District Unit, kiba kynthup naduh u samla Willbest Wanniang Education Secretary KSU West Khasi Hills District Unit, samla Copperfield Khardewsaw Assistant Education Secretary KSU West Khasi Hills District Unit, lem bad kiwei ki dkhot jong ka KSU West Khasi Hills District Unit.
U samla Franklinroy Syiemiong General Secretary KSU West Khasi Hills District Unit u la long u kongsan jong katei ka lympung. Haba ai jingkren, u la ong ba dei ka seng KSU kaba nyngkong ban sam ïa ka khusnam sah ki ba wan shakhmat ban pynshlur bad ai mynsiem ïa ki paradoh parasnam, khamtam ïa ki samla pule kiba dei ka jingkyrmen ïa ka lawei ka pateng ban wan.
U la ong ba ka jingai ïa ki momento ka dei tang ka dak hynrei kaba kongsan ka dei ka mynsiem ba ka KSU ka pyrsad mynsiem na ka bynta jong ki samla pule, ba kin nang ïai trei shitom ha ki bynta kiba dang sah. U la ai mynsiem ruh ïa ki samla pule ba kin nangïai kiew shaphrang bad kumjuh ruh ïa ki dkhot jong ka seng ba kin nangtei ïa kaba mynta bad pynkhreh ïa ka la shai.
