Rambrai, Risaw, 30: Ka kong Aicifull K.Musulman kaba dei ka kyrtong ka ban ieng na ka seng All India Trinamul Congress na Rambrai Jyrngam konstitwensi na ka bynta ka election 2023, ha ka sngi saitjaiñ ka la hiar sha ka shnong Mawïamsyiem, Umriang Mawïamsyiem bad sha ka shnong Mawblang Mawïamsyiem, ban pynlong ïa ka jingïalang paidbah ha kitei ki lai tylli ki shnong, ha kaba la ïohi ruh ba shibun na ki longkmie bad ki longkpa kynthup ki Garo kiba na kitei ki shnong, kiba la wan ban sngap bad shah shkor ïa ka jingkren bad ïa ka jingïawer jong katei ka kyrtong ban kyrshan bad ban bud ïa ka ha kane ka samoi kaba mynta.
Ha kitei ki lai tylli ki jingïalang paidbah la ïadonlang ruh u bah Passtar Nongshillong Sordar ka shnong Mawïamsyiem, u bah Jinarson Marak second Headman ka shnong Umriangkona, u bah Histing Sangma Headman Mawblang Mawïamsyiem bad kiwei kiwei ki riew rangbah jong katei ka thaiñ.
Haba ïakren bad u nongthoh khubor, kitei ki riew rangbah ki la ong ba baroh shi katta ym pat ju don mano mano ruh ki nongmihkhmat kiba la wan iuh kjat ha katei ka thaiñ. Hynrei da ka jingwan jong ka kong Aicifull ka la pynlung mynsiem ïa ki bad ki la pynpaw ruh ba mynta ka kynti, kin kyrshan radbah noh ïa ka kong Aicifull bad dawa ruh na ka seng AITC ba ka dei ban ai tiket ïa ka kong Aicifull, namar ka longkmie ka nang bad ka sngewthuh ïa jingeh jong ka ïing.
Ha katei ka jingïalang ka kong Aicifull K.Musulman, haba ai jingkren sha ki paidbah jong katei ka thaiñ ha baroh kitei ki lai tylli ki shnong ka la ong, “Nga kyrpad ïa phi ba phin pyrshang ban kyrshan noh da ka longkmie ha kane ka kynti kaba mynta na kane ka Rambrai jyrngam konstitwensi. Nga kum ka longkmie nga lah ruh ban ong ba nga kham sngewthuh ïa ka khïa ka shon jong ki paidbah namar nga la mad naduh na la ïing”.
“Lada phi jied ïa nga bad lada ngan poi sha ka thong, bun ki jingeh kiba ngi lah ban pynbha bad ban pynthymmai ruh ha ka rukom pyntreikam ïa ki scheme bad kiwei kiwei ki jingdonkam jong u paidbah, namar ka dei tang kane hi ka seng ka bym pat don kano kano ka jingthohbria ha ka kam saiñ pyrthei. Ka dei ruh ka seng kaba angnud ban wanrah ïa ka jingkylla ha ka jylla hi baroh kawei kaba dei ruh ka seng kaba dang thymmai ha kane ka jylla jong ngi”, ka la ong.
Ka kong Aicifull K.Musulman ka dei kaba shong ba sah ha ka shnong Mawrusyiar bad ka ju trei kum kawei na ki nongsumar ïa ki khunswet hynrei ka angnud ruh ban shakri paidbah.
