La pyllait ïa ka SIR Final Electoral Roll jong ki 4 tylli ki Konstiwensi haWJHs.District

Jowai, Risaw 26: Ïaka Final Electoral Roll jong ki Saw tylli ki Assembly Constituency kynthup ïaka 1-Nartiang, 2-Jowai, 3-Raliang bad 4-Mowkaiaw, hadien bala pyndep ïa ka Special Intensive Revision (SIR) la pyllait bad sam ki kynhun saiñ hima sima mynta ka sngi 26 tarik u Risaw, 2026 ha Conference Hall jong ka DC ophis Jowai.
Ha kane ka jingïalang la donlang da u Deputy Commissioner ka WJHD u Abhinav Kumar Singh, IAS, ka kong D.V Lyngdoh, Additional Deputy Commissioner (Election), u Kyntu Shullai, MCS, Assistant Commissioner, u Block Development Officer, Laskeiñ C&RD bad ki kynhun ba mihkhmat na ki saiñ hima sima.
Haba kren sha ki kynhun ba mihkhmat naki kynhun saiñ hima sima, u Deputy Commissioner ula pynpaw ba ka District, kynthup ïaka Amlarem Constituency ki don baroh 2,13,130 ngut. Ula pyntip ki don 3159 ngut ki nongthep vote thymmai kiba la pynrung kyrteng lyngba ka Form 6 hadien ba la pynmih ïa ka draft roll, katba 496 ngut ki bym dei hok la weng noh. Ula ai khublei ïa baroh ki seng saiñ pyrthei kiba la ai ka jingïatreilang bad u ai khublei ïa ka kynhun jong ka elekshon kiba la pyndep ïaka jingpynkylla ïa ka SIR hashwa ka por ba la buh.
Ka kong D.V Lyngdoh, Additional Deputy Commissioner (Election) kala ai khublei ïa ki kynhun seng saiñ hima sima kiba ai ka jingïatreilang bad ka jingwan man ka por sha ka jingïalang ha ka jingpyntreikam ïa ka SIR. Kala pynpaw ba ym shym la ïoh kano kano ka jingujor na kino kino ki seng saiñ pyrthei halor kane, kala ai khublei ruh ïa ki nongtrei elekshon namar ka jingtrei shitom jong ki ban pyndep ïa kane ka kam.
Katkum ka thup kyrteng thep vote kaba khatduh (final electoral rolls) ka District ka don 1,12,014 ngut ki kynthei bad 1,01,116 ngut ki shynrang.
Katkum ka jingkheiñ ki don 47,000 ngut ha Nartiang Constituency ba kynthup 22,668 ngut ki shynrang bad 24,332 ngut ki kynthai. 42,034 ngut ha Jowai Constituency kynthup 19,384 ngut ki shynrang bad 22,650 ngut ki kynthai. 41,726 ha Raliang Constituency kynthup 19,472 ki shynrang bad 22,254 ki kynthei. Katba 41168 ha Mowkaiaw Constituency kynthup 19,849 ki shynrang bad 21,319 ki kynthei.
Kiba pynrung kyrteng thymmai ki kynthup ha Nartiang 972 ngut (444 ngut ki shynrang bad 528 ngut ki kynthei), ha Jowai 618 ngut (288 ngut ki shynrang bad 330 ngut ki kynthei), ha Raliang 863 ngut (438 ngut ki shynrang bad 425 ngut ki kynthei) bad ha Mowkaiaw 706 ngut (373 ngut ki shynrang bad 333 ngut ki kynthei).