Nongstoiñ, Risaw, 30: U Bah Bobby Kharshandi u bym shym la ïoh shuh ïa ka tiket na ka party Hills State People Democratic People Nongstoiñ, u la rai ryngkat ki nongkyrshan jong u ban ïakhun noh kum u Independent Candidate na Nongstoiñ Assembly Constituency.
Kane ka rai ka la mih ha ka jingïakynduhlang jong ki nongkyrshan jong u ha Nongstoiñ ha ka sngi saitjaiñ, ha kaba ka la don ka jingïakren ïa phylliew jingmut halor ka jingthmu ban ïakhun noh kum u Independent Candidate, ha kaba baroh kiba la kyrshan ïa u ki la shim lang ïa ka rai ba un ïaleh beit ïa ka elekshon.
Hadien ka jingïathir kaba la neh katto katne kynta, da kawei ka jingmut la rai ba thaw ïa ka Executive Committee jong ka kynhun bad la jied ruh ïa ki nongkitkam jong ka women wing bad youth wing ki ban sa pyntyllun ïa ka kam nangne shakhmat.
Ki nongkitkam ba hakhmat kiba la jied ha katei ka sngi na ka bynta ka EC ki long Chairman Bah Kwik Lyngdoh, Vice Chairman Bah Samwell Marngar, Secretary D.F Wahlang, Assistant Secretary Markus Marweiñ bad Silvester Ryntong, Treasurer Cleverness Nongsiej bad ki Adviser ki long u Bah Tleding Wanniang bad Bah Donbok Thabah.
Ha kane ka jingïalang, hashwa ban jied ïa ki nongkitkam, la ïoh ïa ka jingkren na kitei ki rangbah bad kumjuh ruh ki longkmie, kiba la pynpaw ïa ka jingdiaw mynsiem ha kaba ki nongkitkam ba hakhlieh ka HSPDP kim shym la sngap satia ïa ka jingkwah jong ki ban ai tiket ha u Bah Bobby. Ki la ong ba kane ka jingbym sngap ka dei ka jingleh shilliang jong ki nongïalam ka party.
Na ka liang u Bah Donbok Thabah u la pynpaw ba watla u Bah Bobby um ïoh tiket, hynrei kumba la rai lang da baroh ki nongkyrshan, kumta dei ban ïaid beit shakhmat ban ïaleh ïa ka elekshon. U la ong ba baroh hi kiba don ha ka jingïalang ki dei na ka HSPDP, hynrei mynta baroh kin kyrshan ïa u Bah Bobby ban pynliem ïa ka HSPDP.
U la ong ba lada ka HSPDP ka ïoh 5000 vote, u Bah Bobby u dei ban ïoh 7000 vote. Lada ka HSPDP ka ïoh 7000 ka kynhun Independent u Bah Bobby ka dei ban ïoh 10000 vote. Ka jingïaleh hi u la ong kan long beit pyrshah ïa ka HSPDP bad lada u Bah Bobby un jop ïa ka thong kumba kwah ki nongkyrshan, baroh kin phai biang sha ka HSPDP hadien ka elekshon 2023. Ka daw u ong namar ka dei ka party kaba tang ma ka hi kaba don ïa ka nongrim ba skhem, ban shakri ïa ka dong ka thaiñ, ka ri bad jaidbynriew kumba la ïalam nongrim da u (L) Maieid Hoping Stone Lyngdoh.
Kiwei pat kum u Bah Tleding Wanniang u la ai jingmut ban pynkhreh lypa ruh ïa ka kynthei na ka bynta ka MDC elekshon. U la kyntu bad ai jingmut ruh sha baroh kiba ka shah jied kum ki nongkitkam bad baroh kiba kyrshan ïa u Bah Bobby Kharshandi, ba kin ïatreilang da ka mynsiem khnang ban kheit ïa ka jingjop ha ka elekshon ban wan.
Kiwei kiwei ki jingïakren ha katei ka sngi ki long kumno ban pynkhlaiñ ïa ka party da kaba sdang ban rung sha ki shnong ki thaw, ki kyndong kynshrot jong ka Constituency bad ba u Bah Bobby un pynkhreh noh ïalade ha kane ka wat jingïakhun da kaba un sdang da ka personal appeal jong u sha ki paidbah ka Constituency.
Kum u kyrtong Independent ba la ïa mon lang da ki nongkyrshan jong u, u Bah Bobby Kharshandi haba kren sha ki nongthoh khubor u la ong, “Ngim shym la ïoh ïa ka tiket na ka party HSPDP, hynrei nga don ka jingkitkhlieh na ka bynta ki paidbah ka thaiñ Nongstoiñ. Namar haba nga rung ha kine ki thaiñ jong ngi naduh u snem 2019, nga ïohi ïa ka jingdonkam kiba bun”.
“Ngi dei na ka ïing ka sem kaba la shakri ïa kane ka thaiñ mynta lah 20 tylli ki snem bad ka jingthrang jong ngi, ka long ban rat diengkhong ïa ka jingduk. Ka jingduk kam dei tang jong ka kpoh, hynrei naduh ka met bad ka mynsiem jingkoit jingkhiah bad ha baroh ki liang”, u la ong.
“Ngi la jied ïa ki nongkitkam naduh ki rangbah, ki longkmie, ki samla bad ngin nang pynkhlaiñ shuh shuh ïa ka kynhun ka jong ngi nangne shakhmat. Ka rai ai kan leit sha ki paidbah lada hap ban ïakhun lyngba ki party ne Independent, namar ban shu pynbor ïa u briew kam don jingmyntoi, namar lashai lashisngi shaei yn poi lada kam don ka jingkitkhlieh kaba shisha. Nga kren shai ba kane ka jingrai ban ïaleh ïa ka elekshon ka dei kaba nga don ka mynsiem kitkhlieh naduh u snem 2019”, u la ong.
