Shillong, Naiwieng 15: Sa kawei pat ka C&RD Block u Myntri Rangbah, u Conrad Sangma, u la plie ha Garo Hills bad mynta ka sngi kadei ka Adokgre C&RD Block.
Kane ka Block kadei kaba la phiah na ka Kharkutta C&RD Block kaba don ha North Garo Hills District. Kane ka Block thymmai ka don 43 tylli ki Shnong bad ka don palat 10 hajar ngut ki nongshongshnong.
Haba kren ha ka jingplie ïa kane ka Block, u Myntri Rangbah u la ong ba u kpa jong u, u (L)PA Sangma u don ka jingïadei kaba jan bad ka thaiñ Adokgre bad u la ju ïathuh ba u don ka jingthmu ban leh eiei na ka bynta ki paidbah kane ka thaiñ. “Nga sngewkmen ba mynta ka sngi, nga la lah ban pynurlong ïa ka jingthmu jong i Pa jong nga”, la ong u Conrad.
U la ïathuh ba u thmu ruh ban shna ïa ka Stadium ha Adokgre bad u pynpaw ka jingkmen ba ka Chenanggre Stadium ha kane ka thaiñ ka jingtrei ka la nang ïaid shaid shaid. Ha kajuh ka por u ïathuh ruh ba ka sorkar ka la shna pynbha ïa ka surok na Adokgre sha Mangsang bad ka jingtrei ka la jan dep artad.
Ha kane kajuh ka sngi, u Myntri Rangbah, u la plie ruh ïa ka ophis ba shipor jong ka Block.
Haba kren ha kane ka jingïalang, u Myntri Rangbah, u la kyntu ruh ïa ki nongrep ba kin registar noh ha ki Producers Group shuwa ka 4 tarik u Nohprah mynta ka snem, namar lyngba kine ki Group ki nongrep kin ïoh jingïarap 5000 tyngka marwei.
