Shillong, Naiwieng, 15: U President jong ka Federation of Khasi Jaintia & Garo People (FKJGP) u Bah Dundee C. Khongsit, u la maham ïa ka Sorkar bad ïa ka tnat Pulit ba kim dei ban khynñiat jubor sha ka kynroh namarba ynda la poi ka kutlad kan mih ka jingïatynjuh bor da ka jingbym banse.
U Bah Khongsit u la pynpaw ïa kane halor ka jingshah khot hajir jong ki nongïalam ka Seng na ka jingshah ktah kti jong ki nongïaid lynti bad ka jingshah pynjulor ki kali ha ka rally ha ka thain Police Bazar, Malki bad Dhankheti ba la pynlong da ka seng pyrshah ïa ka jingkyrduh kam ha ka 28 tarik u Risaw.
Ha kaba ïadei bad kane, ki Pulit ka Sadar Police Station ki la khot hajir sa ïa une u nongïalam ka FKJGP ha ka Lah Sngi U Blei ban tohkit halor kine ki jingjia hadien ba ladep khot hajir ïa baroh ki nongïalam jong kane ka seng.
Ha ka jingïakren bad ki lad pathai khubor hadien ba la mih na Sadar Police Station, u Bah Dundee ula ong, “ngim sngewpher ïa ka jingshah khot hajir namarba ka dei ka kamram jong ki. Nga kwah ban ong ïa ka Sorkar lane ïa ki bor jong ka aiñ wat ym ñiat than ïa ngi sha ka kynroh namarba lada ka poi ka kutlad ngim banse ban phaikhmat bad ban ïatyngkhuh.”
U la ïathuh ba ka jingshah tohkit jong u ha ki Pulit ka long halor kijuh ki kyndon ba la pynngat ïa ki nongïalam ka Seng.
“Ka jingshah khot hajir jong ngi ki nongïalam ka seng ka long kum ka Free Coaching Class ba ka Sorkar ka ai ïa ngi ki sengbhalang kumno ba ngin nang lah ban pynskhem ïa ka nongrim bad ban kren halor ka jingbym ïohkam ïohjam jong ki samla nangne shakhmat namarba kane ka mat ka dei ka kam ïap kam im jong ki longing ka Bri u Hynñiewtrep,” u la ong.
“Kum ka seng ngi shim ïa ka jingkitkhlieh ban ïatynrong lem ïa kata ka jingeh kaba ki kmie ki kpa ki ïakynduh hadien ba ki la trei shitom ban buh skul ïa ki khun ha ki College bad ki University,” u la bynrap.
U la ong ba kane ka jingshah khot hajir jong ki nongïalam ka seng ka long na ka jingpynsaphriang ïa ki Video shoh briew hynrei ka seng kaba la pynlong ïa ka jingtohkit la lap ba ym shym don mano mano ruh ban poi thiah ha hospital.
“Ngim shym la pynksan ïa kata, hynrei na ka liang jong u Superintendent of Police (SP) ka East Khasi Hills u la pynksan ba ka dei tang ki jingjia barit baria ha kaba kiba la shah ktah kti ki la ïoh jingsumar bad leit phai noh sha la ing,” la pynpaw u Bah Khongsit.
Haba kylli, u Bah Khongsit ula ong ba ka Seng ka kyntu ïa ka Sorkar ba kan thaw ïa ki lad ki lynti ban plie lad ïa ki samla la ka long ha ki kam sorkar lane ha kaba seng ïa ki kam lajong. “Hynrei lada ka Sorkar ka leh kuman, ngi tharai lada ngi dang pynlong ïa kano kano ka prokram ngim lah ban tip kaei ka ban jia ba ki khynnah samla ïa mynta ki don hapdeng ka jingdukha mynsiem.”
U la ïathuh ba ka Seng kan sa pynlong ïa ki jingïalang bapher bapher sha ki distrik bad ha ki shnong ki thaw bad ban pynlong ïa ka prokram ba kyrpang na ka bynta ki samla ha ka ophis treikam jong ka Seng kaba la shna khnang ban long ka shlem saiñdur ïa ki khun samla.
