Khlem kot khlem sla treikam ka I-PAC bad ka CAPLIB Infortainment Pvt Ltd

Shillong, Naiwieng 15: Ka kompeni Indian Political Action Committee (I-PAC) ka kaba dei ka consultancy ba la wanrah da ka seng All India Trinamool Congress (AITC), Meghalaya na bynta ban ïarap ïa ki ha ki kam ba ïadei bad ka ilekshon ka la treikam khlem pat pynbiang satia ïa ki kot ki sla ba ki kompeni bar jylla ki dei ban ïoh kum ka Trading License (TL) na KHADC bad kumjuh ruh ka CAPLIB Infortainment Pvt Ltd ka kompeni ai wai kali ba na bar jylla ban kit ban rong ïa ka leit ka wan ki nongtrei jong ka I-PAC.
Kane ka paw pyrthei hadien ba ka Hynñiewtrep National Youth Front(HNYF) East Khasi Hills District ka la buddien hadien ba ki nongñiah kali kamai ha ka jylla khamtam na sor Shillong ki ud ba ka I-PAC ka wanrah pynban da ki kompeni na bar jylla wat la ka dei ka kam kaba ki trai jylla ki la lah ban trei ïa kane ka kam.
Na ka liang ka HNYF ka la kam ba ka la wad jingtip ruh na ka ophis u Licensing Officer ka KHADC halor ki kot ki sla kiba kine ki ar tylli ki kompeni ki la pynbiang ne em ïa ki kot ki sla ba ki dei ban pynbiang ha shuwa ba kino kino ki kompeni na bar jylla kiba mut ban wan treikam ha ki pud ba hap hapoh ka jylli synshar ki District Council, ka HNYF ka lap ba kine ka I-PAC ka dang shu aplai ïa ka Trading License dang ha une u bnai ba la dep wat hadien phra bnai ba ka la sdang treikam ha ka jylla bad buh ïa ka ophis treikam jong ka ha Nongthymmai, Shillong katba kane ka CAPLIB Infortainment Pvt Ltd kam pat shym la aplai satia wat haduh mynta ruh.
Ki nongïalam ka HNYF ki ïathuh ba dei hadien ba ka la lap ïa kine ki jingshisha baroh ha ka sngi Ba-ar ki la leit khynra ïa kane ka ophis treikam ka I-PAC ha ryngkat ka jingsynran lang u Rangbah Dong ka Nongthymmai Springside Block 2 bad katto katne ki riew rangbah jong ka shnong ban leit khang tala ïa katei ka ophis treikam namar ki la shu pynïaid be-ain ïa ki kompeni bad ïaid lait ïa ki kyndon ka aiñ bad wat ïa ki kyndon kiba ka Dorbar Shnong ka la teh ha ka por ba ka ai ïa ka NoC na bynta ba kane ka kompeni kan ïoh aplai ïa ka TL na ka KHADC.
Ka HNYF hadien ba ka la lap ïa kine kiei kiei ka la pynmih ïa baroh ki nongtrei ka I-PAC baroh shabar bad byrngem ban khang tala noh shisyndon katba ym pat biang ki kot ki sla hynrei tang hadien katto katne por ki nongkitkam ka TMC ki la wan poi sha ka ophis treikam ka I-PAC.
Hadien ba kine ki nongtrei bad ki nongïalam ka TMC ki la poi ha katei ka jaka na ka liang ka HNYF la sakhi ba ka dap da ka jinglyngngoh bad la ïohi ba ka HNYF la dang shu tip ba ka I-PAC kadei ka kompeni kaba treikam na ka bynta ka seng saiñ pyrthei TMC.
Haba ïa kren bad ki lad patahi khubor u Rangbah Dong ka Nongthymmai Springside Block 2 u Bah James Khongwir u la ïathuh ba kane ka kompeni ka plie bad sdang treikam be-aiñ ha kane ka ophis watla kim pat ïoh ïa ka TL wat hadien ba ka shnong ka la dep ai NoC naduh u Ïaiong mynta u snem.
“Ngi la dep ai NoC naduh u Ïaiong ba kin ïoh aplai TL na ka KHADC bad ngi la teh kyndon da kaba shai ba kim dei ban treikam katba ym pat ïoh ïa license na ka KHADC hynrei ïa kane ka jingteh kyndon ka shnong ki ïaid lait bad pynkheiñ ruh,” u la ong.
U la ïathuh ruh ba ha ka jingshisha kane ka kompeni ka pan jingbit na ka shnong ba kan shu pynbha bad maramot shuwa ïa ka ophis treikam katba ym pat ïoh ïa ki kot ki sla na ka KHADC.
“Wat hadien phra bnai ba ka shnong ka la ai NoC ki dang shu aplai TL dang ha u Risaw hato ki leh aiu ha kine ki phra bnai ba ladep,” u la buh ingkylli.
Haba kren sha ki lad pathai khubor u Assistant General Secretary ka HNYF u Samla Tyllibor Swer u la ïathuh ba kane ka jingkhynra ka HNYF kam dei na kano kano ka daw khwan myntoi shimet hynrei ban pynthikna ba ki kompeni ba wan ha ka jylla ki dei ban ai kam nyngkong ïa ki trai muluk bad ba ïa ki kam kaba ki trai muluk ki lah ban leh kum ha ka jaka ban khot da ka CAPLIB Infortainment Pvt Ltd hynrei ki dei ban shim wai da ki kali kamai ki trai muluk ba kin im ja bad ïoh kamai.
U la ong ruh ba ha kane ka jingkhynra ka seng ka lap ba kiba bun kiba trei ha kane ka kompeni ki dei kibym dei satia ki Khasi bad ka jingdon ki ongtrei kiba ka la ai kam ki la palat ïa ka 100 ngut eiei.
Shuh shuh u la ong ruh ba ka seng ka ai por haduh ka 22 tarik ba I-PAC kan pyntreikam ïa kane ka mat jingdawa kata ban pynbiang ïa ki kot ki sla bad ban ban weng noh ïa ka kompeni CAPLIB Infortainment Pvt Ltd hynrei ban shim wai da ki kali jong ki trai jylla kum na ka All Shillong Tourist Taxi Drivers United Urganization bad kumjuh ban pynlong da ka interview thymmai ban plie lad ïa ki samla trai muluk kin ïoh kam ha kane ka kompeni.