Sngewbha khot noh ïa ka sngi burom ki nonghikai kum ka sngi leh burom ïa ki kruiñ: KJDSTA
Shillong, Naiwieng 17: Ka KJDSTA ka la pynpaw ïa ka jingbitar kaba jur halor ka jingkren jong u Deputy Chief Minister u Bah Prestone Tynsong da kaba pynïanujor ïa ki nonghikai kiba ïakhih bad ki “kniang” bad “ki soh ba pyut.”
Haba kren ha ki lad pathai khubor, ki nongkitkam jong ka KJDSTA ki la ong ba ki la shakri kum ki nonghikai la palat 25 snem bad kane ka dei ka sien kaba nyngkong ba la sngew ba la shah pynjah burom kum ki nonghikai.
“Lada ngi dei ki khniang, ne ki kruiñ te dei ban pynkylla ïa ka Teachers’ Day sha ka sngi ban burom ïa ki khniang ne ki kruiñ”, ong ki nonghikai.
“Ka jingkren jong u Myntri Rangbah ka long kum ban ïanujor ïa ngi bad ki mrad.” U president ka KJDSTA u Babu Boswell Pala u la ong ba dei ka sorkar kaba la pynkheiñ ïa ka hok jong ki nonghikai da kaba kyntait ïa ki ban ai ïa ka DA bad CPF.
“Kumno ki nonghikai kin aiti noh sha ka sorkar ïa ka pisa kaba ki la kamai shitom, wat la ka long tang 1 tyngka ruh, khlem kano kano ka jingïapynbeit?” u la kylli.
U la bynrap ruh ba u briew uba pyndonkam kum kine ki kyntien u la pyni ba um kwah ban ïatreilang.
Katba ka KJDSTA ka la pynbna ba kan bteng ïa ka jingïakhih khlem pud kaba la sdang naduh ka 11 tarik u Naiwieng.
U Bah Lamin bad u Bah Pala ki la ïathuh ba ïa kane ka rai la shim ha ka jingïalang ha Sawmer, Upper Shillong, ha ka sngi Nyngkong, namar ka jingbym lah ban pynurlong ïa ki jingdawa jong ki.
U Babu Pala u la ong ba ka seng ka la ïakynduh ïa u Myntri Rangbah ka Jylla u Conrad K. Sangma ha ka 12 tarik Naiwieng, bad u Myntri Rangbah ka Jylla u la kam ba ki jingdawa ki long kiba don nongrim.
U la ïathuh ba la ïoh ïa ka shithi ha katei ka janmiet kaba kyntu ïa ki ban weng noh ïa katei ka jingïakhih, da kaba ong ba u Myntri Rangbah ka jylla u la sngap ïa ki jingeh jong ki.
Hynrei katei ka seng ka la ong ba katei ka shithi ka thoh tang ba ïa ki jingdawa yn eksamin da ka tnad pule puthi, khlem kano kano ka por kaba shai.
“Ngim pat shai lano yn eksamin ïa ki jingdawa”, la ong u Babu Pala.