Pynrem ka VPP ïa ka jingkren jong u Bah Prestone, u la dei ban long ka nuksa kaba don burom: Airpeace

0

Shillong, Naiwieng 17: Ka Voice of the People’s Party (VPP) ka la pynrem jur ïa ka jingkren jong u Deputy Chief Minister ne y Symbud Myntri Rangbah ha ka jingplie ïa ka SSLC Examination Centre ha Khad-ar Blang Border Higher Secondary School, Pongtung, ha ka 12 tarik u Naiwieng.
“Ha ka ri synshar paidbah, ka jingpynpaw pyrshah kam dei ka jingpynjah burom ïa ka sorkar, bad ki nongïakhih kim dei ki nongshun jong ka sorkar”, la ong u nongaiktien ka VPP u Bah Airpeace W. Rani.
Ka seng ka la ong ba katei ka jingpynbna ka pynjah burom ïa ki nonghikai kiba pyndonkam ïa ka hok jong ki ban pynpaw ïa ki jingeh bad ban pyrshah ïa ki mat kiba ktah ïa ki bad ïa ka pule puthi.
“Ki dei ki nongshong shnong kiba don ka hok ban kylli jingkylli, ban dawa jingpynshai bad ban pynpaw ïa ki jingsngewkhia halor ki rai bad ki sienjam jong ka sorkar,” ong u Bah Rani.
U la ong ba ka long kaba sngewsih ba u Bah Tynsong uba la dei ban long ka nuksa jong ka jinglong rangbah, ka jingsngewrit bad ka jingburom ïa ka sur u paidbah, u la jied ban pyndonkam da ki kyntien pynjah burom ïa kiba pynpaw ïa ka jingpyrshah.
“Ka bor synshar kam dei ka lad ban pynjah burom ïa ki paidbah, hynrei ka dei ka jingkitkhlieh ban sngap, sngewthuh bad jubab ïa ki jingkylli jong ki”, la ong u nongïalam ka VPP.
Ka seng ka la dawa na u Tynsong ban pynshai ïa ka jingkren jong u bad ban pyni ïa ka jingburom ïa ki nonghikai kiba pyndonkam ïa ka hok synshar paidbah jong ki.

Leave A Reply

Your email address will not be published.