Shillong, Naiwieng 15 : U Symbud Myntri Rangbah (Deputy Chief Minister) ka jylla u bah Prestone Tynsong u la ong ba ki paid nongshong shnong ka jylla ki la duh ka jingshaniah ha u Myntri Rangbah ba rim ka jylla u Dr Mukul Sangma.
ïa kane u Symbud Myntri Rangbah u la kren halor ka jingkynnoh jong u Dr Mukul ba kane ka sorkar MDA kam don ki skhim ba thymmai hynrei baroh ki dei kiba pur thied beit na ka Integrated Basin Development and Livelihood Promotion (IBDLP). U Dr Mukul u la kynnoh ruh ba ka FOCUS jongka MDA ka dei kaba la shu thok bad pynbiej ïa ki paidbah bad ki pyndonkam ïa ka IBDLP na ka bynta ka jingmyntoi shimet jongki.
Shuh shuh u Symbud Myntri Rangbah u la ong “ Ai ba u Dr Mukul un kren katba u kren ruh kam lei lei namar uba pli um don shuh da kiwei kiwei ki mat ban kren bad nga tip shai ruh ba ki paid nongshong shnong ruh ki la ngiah shoiñ ïa u”.
U bah Prestone u la pynkynmaw ïa une u Myntri Rangbah ba rim ba ha ka por jongu ruh u la sam mar 5000 tyngka bad ki jingri sha ki long ïing longsem ha u snem 2017 kata shwa ka election. “ Ha ka jingshisha ka long thurmur bha ha kato ka por lei lei bad ki paidbah ki dei ban kylli na u Dr Mukul halor kane kaba u la ïalam lynti hi”
U Symbud Myntri Rangbah u la ong ba kane ka skhim ba la wanrah da ka sorakr MDA ka la ïarap da shisha ïa ki paid nongshong shnong ka jylla. “ Kaei kaba ngi leh mynta la ka dei ka FOCUS, ne ka PRIME ngi leh na ka bynta ki paidbah bad kiba la ïoh ki la myntoi shisha khamtam kum ki SHG, ki Cooperative Society ki la ïoh jingmyntoi da shisha lyngba kane ka skhim”.
U la ong shuh shuh “ U Dr Mukul Sangma ula long Myntri Rangbah ka jylla phra snem lynter hynrei u la pheil ban pyndep ka jingpyntreikam ïa ki skhim bad project kiba heh kiba sahteng da ki phew snem katba ka MDA pat tang saw snem tam kiba bun ki projek ba sahteng ki la nang dep mynta.
“ U (Dr Mukul) u la long myntri rangbah phra snem lynter balei phim kylli na kaei ka daw um lah ban pyndep ïaka Crowborough Hotel, hato phin shim kabu ïa kata? Hooid kane ka sorkar ka hap ban ïaid bun ki jingeh bad ar snem lynter tang ka khlam COVID hynrei hapoh ka jingïalam jongu Myntri Rangbah Conrad Sangma ka sorkar MDA ka la lah ban pyndep ïa ka Crowborough Hotel” ong u Symbud Myntri Rangbah.
U la ïathuh ba shen ka sorkar kan sa plie noh sa kawei ka projek ba sahteng ka Mariot Hotel kaba ha Jail Road. U laong “ Kane kan jia hapoh une hi u bnai. Kumta ai ba un bun ktien marwei marwei kat kaba u kwah ban kren hynrei ka jingshisha ka long ba tang kane ka sorkar kaba la trei bad pyni da ki kam bad pyndep ïa kiei kiei kiba sahteng da ki phew snem la ka dei ha kano kano ka jaka ruh” pynkut u bah Prestone.
