Bthah ka HC ïa ka sorkar ban thaw da ki kyndon haba tei jingtei ban ïada ïa ki um ki wah

Shillong, Naiwieng 15 : Ka ïing Bishar High Court jongka Meghalaya ka la bthah ïa ka sorkar jylla ban thaw da ki kyndon aiñ na ka bynta ban tei kino kino ki jingtei khnang ban ïada ïaki um ki wah ha ka jylla ha ki por ban sa wan.
Haba shong bishar halor ka mukotduma PIL halor ka jingkhuid jingsuba ka wah Umiam, ka ïing bishar ( Division Bench) ba la khlieh da u Chief Justicce u Justice Sanjib Banerjee bad u Justice W. Diengdoh ki la rai “ ïa ka jingdonkam ka roi ka par ym lah ban ïaidlait hynrei ka sorkar jylla bad ki bor District Council ki dei ban lum ïa ki riew khraw pyrkhat, ki riew shemphang na ka bynta ban thaw noh da ki kyndon na ka bynta ban peit haba tei jingtei khnang ba kin ym don jingktah ïaki um ki wah bad wat ïa ki dohum ruh kum ha Umiam ne ha kiwei kiwei ki jaka ba don ki wah ki pung ruh”. La ïathuh ruh aba ka sorkar bad District Council ruh ki la mynjur ban thung ïa kita ki riewkhraw pyrkhat bad ki riewshemphang ban thaw ïa ki kyndon ban peit ba ki jingitynnad jongka mariang kin ym shah ktah ha ka jylla bad kumjuh ruh ban pynneh pynsah ïaka mariang na ka bynta ka pateng ban wan ym ban duh ïa kine kiei kiei baroh ha ka kyrteng kata ka roi ka par.
Ka ïing bishar ka pynpaw ruh ka jingkyrmen skhem ba ka sorkar jylla bad ka District Council kin shim khia ban pyntip sha ki paidbah ruh ba ka jingitynnad jongka mariang kam dei ban duh.
Ka ïing bishar ka la kyntu ruh ïa ka Meghalaya Tourism Development Forum (MTDF), ki riew paw khmat ha ka imlang ka sahlang kynthup ïa kito ki nongsaiñ dur ban shim ïa ka kam ban ïarap ïa ka ïing bishar halor kane ka kam. Kham mynshwa la dep ai jingtip ba ki kyndon tei ïing ki la don lypa ha ka jylla tangba kine ki dang dei tang haki jaka sor hynrei ha kaba ïadei bad ki thaiñ nongkyndon khamtam kum hajan ki law kyntang, ki wah, ki pung, ki ei kiei ki sawdong sawkun ba la thaw kyrpang da ka mariang ym pat kynthup ha katei ka kyndon aiñ.
Shuh shuh ka ïing bishar ka la pan kaiphod ruh na ka sorkar halor ka jingai bor ïa kitei ki jingtei bad kane ka long hadien ba ka District Council ka la ai jingtip ba lah ban dei ki Dorbar Shnong kiba la ai jingbit ïa baroh lai tylli kitei ki jingtei harud ka wah Umiam hadien ba ki jaka die kali ki la ïoh jingbit kiba don sha kawei pat ka liang jongka surok na ka wah Umiam. Hynrei wat la katta ruh ki jaboh jabaiñ kiba mih na kitei ki jaka ruh ki lah ban tuid sha ki wah namar kam don ka treatment plant ban ïada na ka jingtuid ki jakhlia sha ki wah.
Ka sorkar ka la pyntip ba kat kum ki kyndon aiñ shwa ban tei ïa kino kino ki jingtei dei ban ïoh jingbit na ka Meghalaya State Polution Control Board (MSPCB) Ka sorkar ka la ong ba lah ban pynshitom ïa kito ki briew kiba sdang shwa ïa ki jingtei nangta ki sa pan jingbit pat hadien. Ka ïing bishar ka la pynpaw ba nalor kitei ki ïing paki kiba heh kiba la mih ha katei ka pung umiam, ki la don ruh sa kiwei kiwei kiba la mih mynta dang shen lane kiba dang khreh tei. Kine ki lah ban pynïaid shakhmat ïa ka kam lada ym dei ba shim khia ka ïing bishar.
Ka MSPCB ka pyntip ba baroh lai kitei ki jingtei harud ka pung Umiam kim shym la ïaid kat kum ki kyndon na ka bynta ïoh jingbit ban tei ia ki jingtei haruh ka Dam Umiam. Kane ka kaiphod jongka MSPCB ka long hadien ba la leit jurip lang bad ka District Council ha ka 10 tarik Naiwieng hadien ba ka ïing bishar ka la bthah ba dei ban pyntreikam pyrkhing ïaki kyndon wat ha kaba ïadei bad ka Moon View Cafe, Ri-Shar Sngi bad ka Orchid Resort, Ever Banalari Guest House bad Hills Cafe nalor ka M/s Megha Automative LLP, M/s Highland Toyota bad M/s Rockland Motors LLP. Kane ka kaiphod ka ong ba dei ban pyntreikam ruh ïa ki kyndon ba pyrkhing bad kiwei kiwei ki Hotel bad Resort kiba don sawdong ka Dam ne Pung Umiam.
Ka ïing bishar ka la ong ba ka sorkar jylla bad ka District Council ki la mynjur ba tad haduh ban da dep thaw ïa ki kyndon hadien ba la ïamir jingmut bad ki khraw pyrkhat, ki riewshemphang, ki stad mariang, ki riew pawkhmat, ki nongsaiñ dur ka rai kaba la shim mynshwa da ka ïing bishar kan dang bteng ban treikam. Kito pat ki jaka die kali ki hotel ki resort kiba la treikam ki dei ban pynthikna ba kam dei ban don ka jingktah ïa ka mariang bad ki dei ban pynthikna ban pynneh pynsah ïa ka mariang , ïaki wah, ki pung ki lah ban dang ïai bteng beit ban treikam.
Nalor kata ka ïing bishar ka la bthah ruh ïa ka sorkar ban wad jaka bret niut shawei namar kane ka la dap khnang ba ka um jaboh ne ki jakhlia kin ym ïoh tuid sha ka pung umiam kaba la dap lypa da ki jingjakhliah. Ka ïing bishar kan shong bishar biang ha ka 2 tarik Kyllalyngkot 2023.