Sha ïingbishar High Court mudui ka HYC halor ka jinglong jingman ka surok Shillong-Pynursla-Dawki

Shillong, Ïaïong 21: Ka Hynniewtrep Youths’ Council (HYC) ha ka sngi Ba-ar kala mudui ïa ka mukotduma ha Ïingkashari Meghalaya High Court, bad kyrpad ba kan tuklar mardor ïa kaei kaba ka khot “ka jingma kaba nang kham shyrkhei” halor ka jinglong jingman jong ka surok Shillong-Pynursla-Dawki kaba dang ïaid ha ka jingpynïar bad ka jingtei.
Ha ka kyrwoh, u President ka HYC u Bah Roy Kupar Synrem ula ong, ba ka seng kala ai jingmut ia ka sorkar jylla, NHIDCL bad ia ka Public Works Department (PWD) ban pyntreikam mardor ïa ki lad jingïada, ban leh ïa ka road safety audit, ban pyrkhing ïa ka rukom ïaid ki kali ha ka por ba dang iaid ka jingpyntrei bad ban pynthikna ba kan don ka jingshim ïa ka jingkitkhlieh da ki bor kiba dei khmih ban ai ka jingshngain ïa u paitbah.
“Ka surok kala nangbuh ha ka jingma na ka bynta ki nongiaid nongieng namar ka jingbym shngain ka rukom shna kaba kynthup ïa ka jingbym don ïa ki jingthoh kiba ai ïa ki jingmaham, jingker, ki jingai dak bad ka jingbym don ruh ïaka rukom kaba biang ha kaban phiah ïa ki surok ha kylleng ki jaka” ula ong.
Ka Council kala kam ba katto katne ki bynta jong ka surok kila kylla long kiba don jingma bha kaba lam sha kiba bun tylli ki jingjia aksiden, ki jingmynsaw bad ka jingjulor ki kali.
Kala pynpaw ïa ka jingsngewkhia ba bun ki jingim ki lah ban duh lada ym shimkhia mardor ïa ki lad jingiada bad ban pyntreikam noh ïa ki.
“Ki kam pynroi bad ki projek jong ki jingtei ym dei ban pyniaid shakhmat ban buh ha ka jingma ïa ka jingim jong ki briew hynrei ka jingshngain jong ki paitbah dei ban buh hakhmat eh” ong u Bah Synrem.
“Ngi pynpaw ïa ka jingkyrmen ba ka High Court kan tuklar ban pynthikna ba ïa ki lad jingiada dei ban buh ryntih khnang ban ïada bad ba kan ym don shuh ka jingduh ïa ki mynsiem briew bad ïa ki jingdon jingem” ula bynrap.