Da ka CM-INSPIRE, pynshlur ka sorkar ïa ki samla kiba kwah long Sahep IAS jong ka jylla

Shillong, Ïaiong 21: Ka sorkar Meghalaya ka la shim ïa ka sien ban sdang noh ïa ka skhim CM-INSPIRE ban kyrshan bad pynkhlain ïa ka khun samla jong ka jylla kiba thrang bad kiba kwah ban long ophisar civil services jong ka ri India.
Haba pynbna ïa kane ka jingthmu, u Myntri Rangbah ka Jylla Conrad K Sangma u la ong ba kane ka skhim ka thmu ban kyntiew ïa ki khun samla namar ka jinghiar ki kyrtong trai ri trai muluk ha ki eksamin jong ka Union Public Service Commission (UPSC).
Haba kren shaphang kane ka jingthmu, u Sangma u la batai ba kane kan long kum ka sienjam kaba kongsan ban kyrshan ïa ki jingangnud jong ki khun samla.U la kdew ba la bun snem, ka jingmih khmat na ka jylla ha ki kam sorkar ka la nang hiar, bad ka skhim thymmai ka thmu ban weng ïa kane ka jingduna.
Hapoh ka CM-INSPIRE, ki kyrtong kiba pass ïa ka UPSC Preliminary Examination kin ioh ïa ka jingiarap pisa kaba ?50,000 hajar, katba kito kiba pyndep ïa ka Mains kin ioh ïa ka khusnam ba ?1 lak.Ïa kane ka jingthmu la thmu ban pynduna ïa ka jingkit ba khia ha ka liang ka pisa tyngka jong ki nongthmu bad ban pynthikna ba ki kyrtong kiba lah kin ym shah khanglad ha ki jingeh ha ka liang ka ioh ka kot.
U myntri rangbah u la pynthikna ruh ba ka sorkar ka dang ïai bteng ban kyrshan ïa baroh kiba kwah ban ïakhun ïa kane ka eksamin bad u la pynshlur ïa ki ban ïai pynleit jingmut bha ha ka thong ba ki don.
Ki kyrtong kiba shah jied ki lah ban aplai lyngba ka Meghalaya Administrative Training Institute (MATI) portal ynda la plie ïa ki applications.
La khmih lynti ba kane ka skhim kan ai ka jingkyrshan kaba khraw ïa kiba kwah ban long kum ki civil service ha ka jylla, katba kan pynskhem ïa ka jingthmu jong ka sorkar ban pynsan pynrangbah ïa ki nongïalam ha ka lawei.