Ai jingithuh u Lamphang ka ïingdorbar Thaw Aiñ ïa 3 ngut ki MLA UDP ba ïasoh NPP

Shillong, Risaw 23 : U Lamphang ka ïingdorbar Thawaiñ ka Jylla, u Thomas A. Sangma ha ka janmiet sngi Thohdieng u la pyntip ba u la ai ka jingithuh kaba pura ïa ka jingpynïasoh jong ki lai ngut ki MLA ka United Democratic Party (UDP) sha ka National People’s Party (NPP), katkum ka Paragraph 4 jong ka Khyrnit ba Shiphew jong ka Riti Synshar ka Ri India.
Katkum ka hukum ba la pynmih da ka Assembly Secretariat jong ka Iingdorbar Thawaiñ ka Jylla ha ka 23 tarik Risaw, 2026, kine ki lai ngut ki MLA kiba la ïoh ka jingithuh kum ki MLA ka NPP ki kynthup ïa u Bah Paul Lyngdoh, MLA na 18-West Shillong nangta u Bah Renikton Lyngdoh Tongkhar, MLA na 36-Mawkyrwat; bad u Bah Nujorki Sungoh, MLA na ka 4-Mowkaiaw.
Kane ka hukum ka wan hadien ka rai jong u Lamphang ha ka 16 tarik Risaw, 2026, ban ithuh ïa ka jingpynïasoh jong phra ngut ki MLA ka UDP bad ka Bharatiya Janata Party (BJP), kaba la pynlong ïa ka UDP ban sah sa tang saw ngut ki MLA.
Shuh shuh la ong ba ha ka 17 tarik Risaw, 2026, lai ngut na kitei ki saw ngut ki MLA kiba dang sah ki la phah ïa ka jingthoh sha u Lamphang, da kaba pyntip ïa ka rai jong ki ban pynïasoh bad ka NPP. “Ha ka jingthoh, ki la pynshai ba ki long palat ar bynta na lai bynta jong ki dkhot ka UDP Legislature Party, kaba biang katkum ka Paragraph 4(2) jong ka Tenth Schedule jong ka Riti Synshar ka Ri India,” ong ka kyrwoh.
Ka jingthoh ka la kdew ruh ba lyngba ka rai kaba la shim ha ka 17 tarik Risaw, 2026, ka UDP, kum ka seng saiñ pyrthei tynrai ha Meghalaya, ka la rai ban pynïasoh bad ka NPP.
“Ïa kane ka shithi la wanrah hakhmat u Lamphang ha ka 19 tarik Risaw, 2026, bad u la bthah ïa ki MLA ban wan hi markhmat ban pynshisha ïa ka jingthmu jong ki. Ar ngut na kitei ki lai ngut ki MLA ki la wan hakhmat u Lamphang ha kajuh ka sngi, ki la pynshisha ïa ka jingthoh bad pynskhem biang ïa ka rai jong ki,” la bynrap biang ka kyrwoh.
Hadien ka jingbishar ïa ka kam bad haba la sngewskhem ba ka rai ka long da ka mon sngewbha jong ki, u Lamphang lyngba ka hukum jong u ha ka 23 tarik Risaw, 2026, u la pdiang bad ithuh ïa kane ka jingpynïasoh.
U la ong ruh ba ïa kine ki lai ngut ki MLA yn ai jaka shong hapoh ka Iingdorbar Thawaiñ ka Meghalaya kum ki dkhot jong ka NPP.