Balei hap wanrah ki consultant ba nabar ban batai ïa u Lum Shyllong, balei ym pyndonkam da ki jong lajong: Congress

Shillong, Risaw 23: Ka Meghalaya Pradesh Congress Committee ka la ïathuh ba katkum ka website jong ka Meghalaya Institute of Governance ka pyni ba tang 27 ngut ki briew kiba leit sha ka jingïalang bishar paidbah ha kaba ïadei bad ka jingthmu ban tei ïa ka Shyllong Peak Ropeway Project ha u snem 2022 bad 5 ngut ki dei na ka sorkar bad kiwei pat ki dei kiba na thaiñ Laban bad tang 3 haduh 4 ngut ki dei na ka Riat Laban bad na ka 27 ngut kumba 80% kim pdiang ne Negative kum kaba ïadei bad ka jingdon ki wahduid bad ki jingshah ktah jong ki.
Halor kane u Bah Ebenzer Syiem Research Associates ka Meghalaya Pradesh Congress Committee u la ong ba katkum ki kot ki sla na ka bynta ka Lower Terminal ka jingdonkam jaka ka long 4000 square metre malu mala 1 acre bad ka Upper Terminal ha ka jaka ba rben ka khlaw kin pynkhuid ïa ka jaka haduh 1 acre bad ka jaka long ruh 2400 square metre bad kin pynkhuid ½ acre ka jaka khlaw bad ka khyndew hapoh ka Ropeway kan donkam 20 mitre ne 60ft bad ka jingjngai ka jingïaid ka Ropeway kan long 1km bad dei ban pynïeng 5 tylli ki tower ban kyrshan bad watla ki ong ba kin ym pom ïa ki dieng ha ka Right off way kane ka long kaba ym lah ban tip namar mynta la pynlut T. 100 klur bad la don ruh ka jingpom dieng.
“Ki don 5 tylli ki jait ropeway, hynrei ka jylla ka lajied ïa ka Mono cable Gondola kaba suk ban sumar bad kaba tad bad ka jingpynlut kaba T. 108 ki jied pat ïa ka jingdon tang uwei u waïar,” u la ong.
Katba u General Secretary ka MPCC u Bah Manuel Badwar u la ong ba ka jylla ka don ïa ka tnat Water Resources, ka Soil Conservation, ka Pollution Control Board, ka Geological Survey bad kine ki dei ban iatreilang, hynrei kumba long mynta kam idon kane.
“Kine ki tnat ki dei ban wad ïa ka um (water tables), ka jingïaid ka um shapoh khyndew, ka jingdon ki dieng, ka jingshah ktah ka lyer hapoh nongbah Shillong bad dei ban pyni shai sha ki paidbah ïa ki jingmyntoi bad jingduhnong bad kumno ki 27 ngut kin rai ïa ka lawei jong ki 7-8 lak ngut ki nongshong shnong ka Shillong bad ngi tip bha ba u Lum Shyllong u pynneh ïa ka jingsam um, lada khlem shim jingkheiñ lut ïa baroh kane ka dei kaba bakla, wat la kynnoh ba ka jingpyrshah ka mih la slem ruh hynrei ka jingshisha ka long ba la sdang da ka lynti kaba bakla namar kam don ka jingtreikam kaba shai,” ong u Bah Badwar.
U la ong ba ka Congress kam pyrshah pura ïa ka roi ka san hynrei lada ka roi ka san ka wan da ka lynti kaba lyngkot (short cut) ym lah ban mynjur. “Ka jylla ka don ha ka kyrdan kaba 5 jong ka jinglah ban khih u jumai, na ka bynta ka jong ngi ka Ropeway kaba don tang uwei u waiar kam long shngaiñ, kumta ka sorkar kadei ban pyndonkam da ki tnat sorkar la jong balei hap donkam ïa ki consultant kiba nabar, kumno don tang ka tnat Tourism bad kaei ba kane ka la leh ban pynneh ne tyngkai ïa ka sawdong sawkun,” u la bynrap.
U la ïathuh ruh ba ka don ka Thlong Mawlong kaba dei ka pung ha kjat jong ka project bad ka sorkar ka ong ba yn ym don ki wahduid ki ban shah ktah. “Kane ka pyni ba ka sorkar ka khlem leh eiei ruh em ïa ki jingwad bniah ïa ki tyllong um, jingdon ka um bad kiwei, kumta donkam ban pyndam ne ban rah noh shawei ïa kane ka projek,” u la ong.
Haba phai sha ka jingïohnong ha ka khajna bad ïohkam, u Bah Badwar u la ong ba ka sorkar kadei ban pyntip sha kino ki hotel ki tourist kin sah, katno yn ïoh kam bad katno kan kyntiew ïa ka ïoh ka kot ka jylla.