SPAIN, Risaw 24: U kapten barim ka Argentina u Lionel Messi u la khur ïa ka khusnam 2026 Princesa de Asturias Award na ka bynta ka kam ïalehkai, da kaba pynpaw ïa kane ka jingithuh kum ka burom kaba iaid palat ïa ki jingjop jong u ha madan phutbol.
U Messi u la ai burom kyrpang ïa u kpa jong u ha kane ka jingïalang ba u la ïoh pdiang ïa kane ka khusnam, uba la pynbor ïa u ban wan sha kane ka jingïalang wat hapdeng ka jingkhim ka por namar ka jingïatyngkhuh ka prokram ïalehkai.
“Ngi tip ba kan long kaba eh namar ka por ïalehkai jong nga, hynrei u la kyntu shisha ba ngin wan, ba ngan wan shane ban pynlut ïa kine ki sngi bad ban pdiang ïa kane ka khusnam,” u la ong.
“Kane ka khusnam ka ïaid palat ïa kaei kaba phi leh ha madan ne kaei kaba nga la jop ha ka jingim jong nga baroh kawei,” u la ong.
U Messi u la bynrap ba u kpa jong u u sngewkmen bha ïa kane ka jingithuh bad u thikna ba u ïashim bynta lang ha ka jingkmen ha kane ka khyllipmat.
“Hooid, u la sngewkmen shibun eh ïa kane ka jingithuh bad dei na kata ka daw ba nga thikna ba u ruh u kmen ïa ka,” u la ong.
Kane ka khusnam ka la pyndap shuh ïa ki khusnam shimet bad kynhun jong u Messi. Une u rangïalehkai ba kynsai jong ka Argentina u la jop bun tylli ki khusnam Ballon d’Or, u la ïalam ïa ka ri ban rah nam lahduh ha ka FIFA World Cup 2022 bad u la ïoh ruh ïa ka jingjop kaba khraw ha ka kyrdan jong ki klob, khamtam ha ki snem ba u la don ha Barcelona.
Ka khusnam Princesa de Asturias Awards ka ithuh ïa ki jingjop kiba kham pawnam ha ki bynta ba kynthup ïa ka kam ïalehkai, ka arts, ka science bad ka jingiatreilang bad ki ri ka pyrthei.
