Da jingthoh pynpaw ka JSM ha u Conrad halor ka jingeh ki samla ban leit thoh eksam SSC shabar jylla

Khliehriat, Ïaïong 21: Ka Jaiñtia Students’ Movement (JSM), Central Body, mynta ka sngi 21.04.2026, kala phah daka jingthoh sha u myntri rangbah ka jylla, u Conrad Sangma, ha kaba ka seng ka la pynpaw bad pynsngew sha ka sorkar halor ka jingeh kaba ki samla pule na jylla Meghalaya ha kaba ïadei bad ki eksam ba la pyniaid da ka Staff Selection Commission (SSC).
Katkum ka shithi la ong ba “La ioh jingtip ba kumba ju long ha ki snem ba la dep, la ju pynbiang ïa ki jaka thoh eksam hapoh ka jylla Meghalaya, khamtam ha Shillong, hynrei mynta u snem pat bun na ki samla na Meghalaya la ai jaka thoh eksam ïa ki shabar jylla, kum ha Jorhat, Assam”
Na ka liang ka seng ka la pynpaw shuh shuh ba ka tarik jong ka eksam kaba ju long ha u bnai rymphang, mynta la pynslem bad la buh ban pynlong noh ha ka taïew ba khatduh jong u bnai ïaïong bad u bnai Jymmang 2026, kane ka jingpynkylla bad ka jingpynbiang jaka shabar jylla ka la wanrah ka jingeh kaba khraw ïa ki samla, khamtam kiba na ka thaiñ Jaiñtia Hills. Kane ka jingleh ka ktag ïa ka jinglut jingsep kaba khraw na ka bynta ka leit ka wan, ka jaka sah bad ka bam ka dih, na kata ka daw ka wanrah jingeh ïa ki samla ki ban thoh ïa kane ka exam. Nalor kata, ka jingjngai ka jingleit bad ka por kaba lyngkot ban pynkhreh namar ka jingslem ïa ka eksam ka la pynmih shuh shuh ïa ka jingkhuslai bad lah ban ktah ïa ka jingtreikam jong ki ha kane ka eksam kaba kongsan. Namar ka eksam kan sdang naduh 27 tarik u ïaïong 2026, ki samla kim don por shuh ban pynkhreh bha ïa ki jingdonkam jong ki.
Halor kine baroh, ka JSM Central Body ka kyrpad jur ïa ka sorkar Meghalaya ban shimkhia ïa kane ka kam bad ban kren sha ki bor ba dei peit ban pynurlong ïa kine ki jingdonkam, kata ban pynbiang ïa ki jaka thoh eksam SSC hapoh jylla Meghalaya, khamtam ha Shillong ne kiwei pat ki jaka kiba biang, ban pynkylla biang (re-allotment) ïa ki jaka thoh eksam jong ki samla kiba la bynta sha ki jaka kiba jngai shabar jylla, ban pynthikna ïa ka jingpynbeit por kaba biang ha ki snem ban wan khnang ban lait na kum kine ki jingeh.
“Ka Jaiñtia Students’ Movement kan ïai buddien ban iada ïa ka bha ka miat bad ka jingmyntoi jong ki samla pule ha ka jylla. “Ngi kyrmen skhem ba ka Sorkar kan shimkhia kyrkieh ïa kane ka mat bad ban leh ïa kaba donkam ban iarap ïa ki samla” ong u President Jaiñtia Students’ Movement (JSM) Central Body, u bah Leningstar Rymbai.