Shillong, Naiwieng, 15: Palat 40-50 ngut ki trai khyndew kiba pynpaw ïa ka jingbym mon ban pdiang ïa ka bailutksan bad ban ai jaka na ka bynta ban shna ïa ka surok kaba jrong 95 kilometar na Shillong sha Dawki.
Haba shimkhia ïa kane ka kam, ka Sorkar Jylla ka la bthah ïa ka District Collector jong ka East Khasi Hills ban ïakren pynsngewthuh ïa ki trai khyndew shwa ban kut u Naiwieng.
U Symbud Myntri Rangbah ka Jylla uba peit ïa ka tnat PWD (Roads) u Prestone Tynsong ha ka jingïakren bad ki lad pathai khubor u la ïathuh ba ki don 40-50 ngut ki trai khyndew, ki bym mon satia ban ai ïa ki jaka na ka bynta ban shna ïa ka surok Shillong-Dawki.
“Don na ki, ki bym hun wat ïa ka jingsorjamin bad katto katne kim mon satia ban ai ïa ka jaka na ka bynta ban shna ïa kane ka surok,” u la ong.
“Ngi la bthah ïa ka Deputy Commissioner jong ka East Khasi Hills ban pynkohnguh ïa ki trai jaka ba kin pdiang ïa ka jingsiew bailutksan kham kloi katba lah khnang ba yn dup lah ban aiti noh sha ka National Highways and Infrastructure Development Corporation (NHIDCL) ban pyntreikam ïa ka projek,” la ong u Bah Tynsong.
Haba pyntip ba ki don ar tylli ki bynta jong ka projek kiba ladep khot tender, u Symbud Myntri Rangbah, u la ong, “nga kyrmen ba hapoh u Nohprah, kin sa sdang ïa ka jingtrei.”
Ka jingshna ïa kane surok la bei pisa da ka Japanese International Cooperation Agency (JICA) ha ka jinglut kaba T. 1187.5 klur bad ka jingsiew bai lutksan na ka bynta ka bai khyndew la mang pisa T. 1377.5 klur.
Ha kane ka jingïalang kaba la long bad ki ophisar na ka tnat PWD, Forest, Revenue, PHE bad MeECL u Symbud Myntri Rangbah u la ïathuh ba la ïathir sani halor ka jingpyntrei ïa ka surok Nongstoiñ-Rambrai-Kyrshai bad ka surok na Ranikor–Maheshkhola haduh Baghmara.
U la ong ba ka jingïalang ka la ïathir ïatai ha kaba ïadei bad ki kam ba ïadei hapdeng ka tnat Forest, PHE bad MeECL na ka bynta ban pynkynriah ïa ki post elektrik.
La bthah ruh ïa ki Deputy Commissioner ba kin ïapynbeit bad ki trai khyndew ki bym treh ban pdiang ïa ka jingsiew bailutksan na ka bynta ka jingshna ïa ka surok ha kiwei kiwei de ki distrik.
