Kular u Bah Jason bad Kong Magdalyne ban theh jingïarap ïaka skul ban myntoi ki khynnah

Nongpoh, Naiwieng 15 : Ka skul ba la kyrshan da ka kot khubor Mawphor bad Highland Post ka Mari-Bon Marweiñ Memorial Secondary School, Lad Umpih kaba long kum kawei na ka skul kaba la buh ban ai jingnang jingstad ïa ki khynnah ha ka thaiñ Lad Umpih, Lum Umpih, Umiarong bad kiwei kiwei ki shnong ba marjan ka Umsning, Ri Bhoi, da ka jingphuh jingphieng mynta ka sngi ka la pynhap pyrda noh ïa ka lympung ïalehkai sport ki khynnah skul kaba la neh shi taiew bad ki khynnah skul ruh ki la shim bynta shitrhem ha ki jingïalehkai bapher bapher ha kane ka lympung ïalehkai sport. La pynshongkun bad pynphuh pynphieng ïa ka sngi da ka jingïadon lang ki arngut ki nongmihkhmat ka Umsning Constituency kata u MLA bah Jason S Mawlong kum u kongsan bad I MDC ka Umsning I kong Magdalyne S Mawlong kum i symbud kongsan. Kaba sngewtynnad ka long ba kine baroh arngut ym tang ba ki la ai jingkyrshan ïa ka skul ha ki bynta bapher bapher hynrei ki la kular ruh ban dang ïai ïadon ryngkat bad ka skul bad ïai kyrshan ïa ka skul ba kan nang lah ban ai ka jingshakri ïaki khynnah ha katei ka thaiñ khamtam ba ka dei ka skul kaba kdup ïa ki kup shilliang ki sem shilliang, kiba duk ba rangli.
Ïa kane ka lympung ïalehkai sport ki khynnah skul la pynhap pyrda noh mynta ka sngi da u MLA ka Umsning, u Bah Jason S. Mawlong .
La pynïaid ïa ka jingialang da u bah D.L Siangshai Editor Mawphor kum u shongknor bad la sakhi lang ruh ha kane ka sngi da ka jingdon lang u President ka School Managing Committee, u Bah S.K.M Marweiñ, u Bah J. Thabah, uba dei u executive Editor ka khot khubor Highland Post, ka Kong N.B Marweiñ, Publisher ka kot khubor u Mawphor, ka Head Mistress ka Mari Bon Marweiñ Secondary School, I Dr A. Diengdoh, ki rangbah shnong ka Lad Umpih, Lum Umpih bad Umïarong bad kynthup naduh ki nonghikai bad ki khynnah skul katei ka skul, kiba la pynpaw ka jingkmen ban ïoh kum kane ka lympung ïalehkai sport nalor ka kam pule puthi ha ka skul.
Kum ban pynkynmaw, kane ka Mari Born Marweiñ Memorial Secondary School, Lad Umpih, ka dei ka skul kaba la seng da u (L) Bah R.M Marweiñ, uba dei u trai kot khubor ka khubor u Mawphor ha u snem 2002, da ka jingthmu ban kyntiew ïa ka pule ka puthi ki heprit ha ki shnong nongkyndong bad khamtam na ka bynta ki heprit ba wan na ki longïing longsem baduk ba kyrduh bad lyngba ka jingtrei shitom ki bor pynïaid skul bad ki nonghikai kane ka skul ka la dang kiew shaphrang ha baroh ki liang. Mynta ka sngi kum ka dak ka jingkynmaw ieit ïa ka jingkhlad noh jong i na sla jongkane ka pyrthei ha ka 10 tarik Lber jongu snem 2021 shwa ban sdang ka jingïalang la pynlong ruh ka jingsngap jar ba shi minit.
Lyngba jong kane sngi, nalor ka jingpynhap pyrda ïa kane ka lympung ïalehkai sport ki khynnah, ka Mari Born Marweiñ Memorial Secondary School, ka la sam ruh ïa ka khusnam kyrpang sha ki 3 ngut ki samla pule kiba la pass bha ha ka SSLC examination jong u snem 2022 kiba kynthup ïa ka samla Wandahun Kurbah bad ka Samla Astha Rai kiba wan ha ka kyrdan baar ka SSLC bad ka Samla Phibanribiang Diengdoh ha ka kyrdan ka balai jong ka SSLC examination 2022.
Ha kane ka lympung ïalehkai sport kaba la pynlong baroh shi taiew ki la don saw tylli ki kynhun kiba kynthup ïa ka Kynhun u Tirot Sing Syiem, ka kynhun u Kiang Nongbah, ka kynhun ka Phan Nonglait bad ka kynhun u Patogan Sangma bad ka kynhun kaba la rah ïa ka nam lahduh jong kane ka jingïalehkai sport ka leit sha ka kynhun u Tirot Sing Syiem kaba la ioh khur haduh 365 point.
Ïa kitei ki khunsnam na ka bynta ki nongjop ha ki jingïalehkai sport bapher bapher bad kumjuh ruh ïa katei ka khusnam kyrpang na ka bynta ki samla ba pass bha ha ka SSLC examination la sam da u MLA ka Umsning, u Bah Jason S. Mawlong, uba long u kongsan bad ka MDC ka Umsning, ka Kong Macdalyne S. Mawlong kaba long ka symbud kongsan bad ryngkat ka jingïarap sam lang kitei ki riew rangbah kiba la sakhi ïa kane ka sngi ba la pynhap pyrda noh ïa kane ka lympung ïalehkai sport ki khynnah skul.
Haba ai jingkren ha kane ka sngi, naduh u MLA ka Umsning, u Bah Jason S. Mawlong bad ka MDC ka Umsning, ka Kong Macdalyne S. Mawlong kum ki nongmihkhmat ka Umsning Constituency, ki la ai ka jingïaroh kaba khraw ïa ki bor pynïaid katei ka skul bad khamtam ïa u (L) Bah R.M Marweiñ,uba don ka jingiohi jngai bad ka mynsiem ba jynsjur ban seng ïa katei ka skul kaba la ai ka jingshakri ban kyntiew ïa ka pule ka puthi ki khynnah bad khamtam na ka bynta kito ki khynnah kiba ym kot bor ban leit sha ki skul kiba kham biang kiba wan na ki longïing longsem baduk ba kyrduh.
Ki la kyntu ruh ïa ki bor pynïaid ka skul ba ki dei ban bud ïa ki dienjat ba la ïalam da u (L) R.M Marweiñ ban dang kyntiew ïa kane ka skul ba kan dang paw bad kan dang plie lad ïa kiba bun ki khynnah skul ban wan pule ha katei ka skul bad kum ki nongmihkhmat ki kyrmen skhem ruh ba kane ka skul da ka jingïatrei lang kan sa long kawei na ka skul kaba paw ha Ri Bhoi bad ha ka jylla hi baroh kawei, kaba long shisha ka jingsarong ïa ka dong bad ka thaiñ hi baroh kawei.
Shuh shuh, kum ki nongmihkhmat paidbah na Umsning Constituency, ki la ai ruh ka jingkular ba kin dang ai ka jingïatrei lang na ka bynta ban phai khmat ïa shibun ki jingduna kiba dang don hapoh katei ka skul kum ka lynti ka synkien, ka umbam ka umdih bad kiwei kiwei ki jingdonkam khnang ba kane ka skul kan dang kiew shaphrang ban long kawei na ka shlem ai jingstad ïa ki khynnah kumba ka la shakri baroh shi katta ban phai khmat sha ki khynnah skul kiba wan na ki longïing baduk, ki la bynrap.