Shillong, K’Lyngkot, 13: Da ki spah ngut ki nongïalam ba hakhmat jong ka Hills State People’s Democratic Party (HSPDP) na Sohiong constituency kynthup lang ruh na ka People’s Democratic Front (PDF) ki la leit ban pynïasoh noh sha ka United Democratic Party (UDP) ha ka 12tarik mynta u bnai ha ka jingïalang kaba long ha madan Kor, Sohiong.
Ïa kitei ki nongïalam ba hakhmat na kitei ki ar tylli ki party kiba wan ban treilang da ka thong ban ïoh ïa ka jingjop ha ka elekshon MLA kaban long shen, la pdiang sngewbha da u MLA barim ka thaiñ Bah HDR Lyngdoh ba dei ruh u kyrtong ka party ryngkat ka jingdonlang ki nongïalam ka party
Kiba bun kitei ki nongïalam ki la pynpaw ba ka daw kaba pynlong ïa ki ban wan ïasoh noh sha ka UDP kadei hadien ba u MLA jong ki, Bah Samlin Malngiang ula mih noh na ka HSPDP ban leit pynïasoh sha ka NPP dang shen.
Kum ban shu kdew hangne, u Bah HDR Lyngdoh u la wan pynïasoh sha ka UDP ha u Jylliew jong u snem bala dep hadien ba u la resain noh na ka Congress.
Haba kren ha kane ka sngi, u Bah HDR u la ong ba u sngewkmen haduh katta katta ba ki nongïalam na kiwei pat ki party ki donlang kajuh ka jingmut kum ma u, kata ban phaikhmat sha ka party riewlum.
U Bah HDR u la ong ruh ba u don ka jingkyrmen ba da ka jingïai bteng jong ki nongïalam na kiwei pat ki party kan pynkhlain ïa ka jingpynkhreh ban poi sha ka thong ha kane ka elekshon mynta ka kynti.
