Ka TMC ka la dei ban pynleit jingmut tang ha West Bengal, ym ha Meghalaya

0

Shillong, K’lyngkot 13: Ka Chairperson jong ka Social Media and Digital Platforms and Communications Department jong ka All India Congress Committee (AICC) ka Supriya Shrinate ka la ong ba ka jingwan jong ka All India Trinamool Congress (AITC) ban bsuh khlieh ha ka jylla kum ka jingpyrshang ïoh lehse kan ïoh katto katne ka vote share ban ïoh jingithuh noh kum ka National Party ka la pulom lupa bad ong ruh ba ka AITC ym lah ban len ba ka dei ka party kaba khlaiñ tam ha West Bengal bad ba ka dei ban pynleit jingmut tang hangtai.
Haba kren bad ki lad pathai khubor ha ka jingwan iuh kjat jong ka ha Shillong ryngkat ki heh ka AICC ka Supriya Shrinate ka la ong ba ka AITC ka dei ban sngewthuh ba ka jingwan jong ka ha ka jylla ban ïakhun ïa ka Elekshon kan ym lah ban ïoh jingjop kumba ka kyrmen ban jop ha ka elekshon ba dang shu dep ha West Bengal, na kata ka daw ka AITC ka dei ban pynleit jingmut tang ha ka jylla kaba ka khlaiñ ym ban wan tuh ïa ka vote Congress.
“Khlempep ym lah ban len ba ka AITC ka dei ka party kaba khlaiñ tam ha West Bengal bad balei te ba kam pynleit jingmut tang hangtai hynrei ka wan pynban ban pynpra ïa ka vote share jong ka Congress ha kane ka jylla,” ka la ong.
Haba kylli pat halor ka jingïohi jong ka ïa ka jingwan bsuh khlieh ka TMC ha ka jylla, ka supriya shrinate ka la jubab, “Kane ka jingwan bsuh khlieh ban ïakhun elekshon ka dei shi bynta ka jingpyrshang ban ïoh katto katne ka votes share khnang ba ka TMC kan ïoh ka jingithuh kum ka National Party hynrei nga kwah ban ong ba ka TMC kan ïarap ïa ka jingjop ka BJP bad ki party kiba don lang ha ka kumba ka Aam Admi party ka la tuh ïa ka votes share jong ngi ha ka elekshon MLa ba dang shu dep shen ha Gujarat,” bad ka la bynrap, “Ka jingwan ka TMC ha ka jylla kan long thik kumba ka pyrshnag ban bsuh khlieh ha Goa ha kaba ka pheil ban jop tang uei u MLA wat hadien ba ka la lah ban khring ïa u Myntri Rangbah barim katei ka jylla bad ngan ong da kaba shai ba kane hi ka jingwan ka TMC kan ïarap ïa ka BJP. Ka shong ha phi (TMC) ban rai la phin ïarap ban pynjop ïa ka BJP da kaba phin tuh ïa ka Votes share jong ngi ne phin ai lad ba ngin ïakhun ma ngi ka party kaba la long doh longsnam ha ka jylla,” ka la ong.
Haba kylli pat halor ka jingkynnoh ka Kong Ampareen Lyngdoh ka MLA barim kaba la ryngkang na ka Congress sha ka NPP, ba ka Congress ka la pyndkut hi ïa u sai sohpet jong ka jingïadei bad u paidbah, ka Supriya Shrinate ka la jubab, “ka dei ka rukom ki nongïalam barim ka Congress ban beiñ bad khoh ïa ka party hynrei nga kwah ban ong ba ka Congress ka dei ka party u riew paidbah bad u luk u lak uba pdiang lut ïa ki jait bynriew baroh bad ki jait jingngeit niam baroh kum ki jait syntiew bunrong ha kajuh ka song syntiew.”
Shuh shuh haba ïadei bad ka jingmih ki jingkynnoh ba ki nongïalam ka party ha Delhi kim ju sngap ne ai por haba ki nongïalam ka party ki kwah ban kynduh, ka la ong ba kane ka dei tang ka jingtap eit miaw jong ki ban ai daw ïa u paidbah halor ka jingkwah ïasnoh bad ka BJP ne ki party kiba don bad ka.
Ka la ong ba kumba ka party ka lah ban leh bha ha Himalchal Pradesh ka party ruh ka kyrmen ban leh bha ha ka jylla wat la kam don spah ban ïakhun elekshon kumba ïakhun ka BJP ban pynlut ha ki advestisment bad ka jingpynlong raly ba heh.
“Ngin leit sha u paidbah ym ban kular ïa ka hima bneng ne ki khlur u bnai hynrei ngi kular ïa kaei kaba ynda ka party kan thaw sorkar kan lah ban pynurlong bad nga kyrmen ba ki paidbah hi ki pdiang ïa ka party ha Meghalaya ruh,” ka la ong.
Ka la ong ruh ba ka BJP ha ka jylla kan ym jop satia namar ka dei ka party kaba pyrshah ïa ki rit paid bad ki riewlum hynrei ka party kaba kwah ban pynlong ïa ka India ka ri jong ka jingngeit niam ba tang kawei, ka India ba kren tang kawei ka ktien.

Leave A Reply

Your email address will not be published.