Shillong, K’lyngkot 13: Shisngi hadien ba ki dkhot jong ka Hynñiewtrep National Youth movement (HNYM) ki la leit sha KHADC da ka jingmut ban khang tala ïa kane ka ophis jong ka District Council halor ka nongrim ka jingkynnoh ba u Acting Syiem ka Hima Mylliem u Paiem Ainam bad ryngkat u syiem ka Raid Marwet ba ki die lut ïa ki jaka da ki spah akar bad kumjuh ruh halor ka jingdon ki Rangbah Shnong ki bym dei Khasi kiba ïa jingbit ban die bad thied jaka ha katei ka raid, na ka liang u Basan Nongumlong uba dei peit ïa ka Raid Marwet u la ong ba ka liang ka hima ka la shim ïa ki sienjam kiba ïadei bad kane ka kam kata ban thung noh da ki Circle Rangbah Shnong ban peit ïa ki shnong kiba la shong tang da ki bym dei Khasi.
Haba kren sha ki lad pathai khubor, u la ong ba ka liang ka Hima ka la dep ruh ban shim rai ba kito ki shnong kiba ym don Khasi shuh yn kynthup lang noh ïa ka jylli synshar ha kawei ka circle khnang ba yn thung noh da ki circle Rangbah Shnong ban synshar ïa kiba kum kita ki shnong.
Haba bynrap lang ïa kane u Myntri Kharlukhi u Myntri Midnightborn Kharlukhi u la ong, “Kat kum ka rule jong ka KHAD(Appintment and Succession of Syiem, Deputy Syiem, Elector and rangbah Shong of Mylliem Syiemship) Act 2007 ka ai lad ba ki bym dei Khasi kin long tang kum ki nongïarap ban peit ïa ka shnong ha ka hima ha kito ki shnong by don Khasi shuh.
U la ong ba hadien ba ka HNYM ka la ai jingmut halor kane ka kam bad ong ba ka Hima ka la rai ban thung noh da ki circle Rangbah Shnong na ka jaidbynriew ban peit ïa ka kam synshar khadar ha ki shnong kiba kum kita.
