Shillong, K’lyngkot 13: Ka Election Commission of India ECI), kum ka jingïaleh ban pynsuk ïa ki briew kiba la tymmen bad kumjuh ruh kiba anna ka la pynbeit ba na ka bynta jong ki, lada ki sngew shitom ban wan sha jaka thep vote ki lah ban shu thep vote na ïing ruh.
U Chief Election Commissioner jong ka ri India, u Rajiv Kumar, haba ïakren bad ki nongthoh khubor ha Shillong ha ka sngi thohdieng, u la ïathuh ba ha Meghalaya ki don haduh 290 ngut ki nongthep vote kiba la palat 100 snem ka rta. “Ngi sngewnguh ïa ki namar dei na ki ba ka jingsynshar paidbah ka ïai neh ha ri India haduh mynta”, u la ong.
Nangta kiba ki nongthep vote ba la palat 80 snem ka rta pat ki don 22,658 ngut. U Kumar u la ïathuh b aka ECI ka la leh burom kyrpang ïa ki da kaba pyntip kyrpang ruh shimet shimet ïa ki.
Na ka bynta kito kiba kwah ban thep vote na ïing, yn pyndonkam da ki kor ki bor jong ka juk ba mynta ha kaba ki nongpynïaid ïa ka elekshon kin leit sha ki ïing jong ki, ryngkat ka jingïadon lang ki nongmihkhmat ne ki Polling Agent jong ki Poilitical Party, khnang ba kan nym don kano kano ka jingleh tuh ha kaba ïadei bad ka jingthep vote jong ki.
H a kajuh ka por u CEC, u la ong ruh ba ka Commission ka pynshlur ïa ki Samla ba kin wan pynrung kyrteng na ka bynta ban long ki nongthep vote ne ban ïadon bynta ha ka jingïajied nongmihkhmat. Kumba long haduh mynta ki nongthep vote ha Meghalaya kiba naduh 18 haduh 19 snem ki don baroh81,443 ngut. La pynshlur ruh ïa ki Samla kiba la palat 17 snem ka rta ba kin rejistar lypa bad na ka liang ka Commission kan pynrung ïa ki kum ki nongthep vote ki tang shu la dap 18 snem ka rta. Haduh mynta kiba la palat 17 snem kiba la rejistar ki long 950 ngut.
Ka ECI kumba ka la leh ha kine ki elekshon baladep kan buh ruh ki Polling Station kiba kyrpang na ka bynta ki kynthei, ha kaba ki nongpynïaid ïa ka elekshon, ki Pulit pahara bad ki Volunteer kin long beit ki kynthei. Kine ki don 120 tylli ha baroh kawei ka jylla. Nangta kin don ruh 60 tylli ki Polling Station ban pynïad beit tang da ki Samla.
