Shillong, K’lyngkot 13: U Acting Syiem ba mynta jong ka Hima Mylliem u Paiem Ainam Manik Syiem ha ka sngi Thohdieng u la leit ban thep kyrteng kum uwei na ki kyrtong ban ïakhun na bynta ka khet Syiem ba thylli jong ka Hima hadien ba u paiem Latho Manik u syiemm ba la shah sospon u la hiar noh na ka khet syiem na ka daw jong ka jingbym koit bym khiah jong ka met.
Haba kren sha ki lad pathai khubor hadien ba u la dep ban thep kyrteng, u la ong ba na ka liang jong u u la ïaid sha khmat ban thep kyrteng ka dei hadien ba ki bakhraw jong ka Hima ki la ai jingmut ba un ïakhun ïa kane ka elekshon.
“Dei namar kiba khraw jong ka Hima ki la kwah beit ba ki kam ba sahteng kiba nga la sdang ban leh kum u syiem shipor ba la thung da ka Executive Committee jong ka KHADC bad dei namar kata ka daw hi ba nga wan ban thep kyrteng,” u la ong.
Haba kylli halor ka jingdon ki bakhraw kiba lah ban shim bynta ha ka jingjied Syiem, u la ïathuh ba kumba long mynta ki don kumba 41 ngut ki bakhraw kiba lah ban shim bynta ha ka ban jied syiem ha kane ka elekshon.
Ha kane ka sngi ba u Paiem Ainam u wan ban thep kyrteng la wan synran lang da 30 ngut ki bakhraw kiba dei ruh ki nongjied syiem ynda la pynlong ïa ka Elekshon.
