Mawkyrwat, Lber 23 : Ka Se Lajong FC ka la jop pyrshah ïa ka Lamare SC da 2 la 1 ha ka semifinal ba nyngkong bad da kane ka Se Lajong ka la lah ban buh jaka ïa lade ha ka phainal jong ka Mawlangwir Football Community Shield 2022-23, ba la pynïaid da ka Mawlangwir Sports Club.
Katei jingïalehkai semifinal ba nyngkong hapdeng kitei ki ar tylli ki kynhun ka la long kaba i shongshit bha ha kaba baroh ar ki la ïakhun tyngeh ban pynkhih jar. Ha ka kylla step, ka Se Lajong ka la ïoh ban pynkhih jar nyngkong eh.
Ha ka kylla miet, ka jingïalehkai ka la nang itynnad shuh shuh bad ka la nang pynshongshit ïa u paidbah nongwan peit kai. Ka Se Lajong sa shisien pat ka la ïoh ïa ka kabu ksiar ban thep sa kawei ka kol. Ka Lamare ruh ka la ïa khun tyngeh ban ïoh pynphai bad ha shwa ban kut ka jingïalehkai ka la ïoh ban thep shi kol lyngba ka penalty hynrei ka la lah ban thep tang kane kawei ka kol khlem da ïoh lad shuh ban pynphai bad namarkata, ka hap ban mad ïa ka namrem. Da kane ka jingjop, ka Se Lajong ka la poi sha ka phainal jong kane ka lympung ïalehkai.
Ka semifinal ka ba ar pat kan long hapdeng ka Azriel SC pyrshah ïa ka Nongbri Brothers FC ha ka 4 tarik u Ïaïong, 2023, ha ka por 2 baje nohphaisngi, ha Madan Saitsnad, Mawlangwir.
