Da kaba tyngeh byrngem ki nonghikai Deficit lada ym pynbeit ka sorkar ïa ki jingdawa ha shwa 9 tarik Risaw

Shillong, Nailur 25 : Ki nonghikai skul deficit ha ka Sngi Thohdieng ki la byrngem ban pynlong ïa ki jingïakhih kiba jur ha baroh ka jylla lada ka sorkar jylla kam lah ban pynbeit ïa ki hynriew tylli ki mat jingdawa kiba la slem bah bad ki la ai por ïa ka sorkar tad haduh ka 9 tarik Risaw.
Ïa kane ka por ba ki buh, la pynbna da u President ka Khasi Jaintia Deficit School Teachers’ Association (KJDSTA), u Boswell Pala, hadien ka jingïaid paidbah na ka ophis MBOSE sha madan Malki . Ïa ka jingïakhih la pynlong lang da ka KJDSTA bad ka Garo Hills Deficit School Teachers and Employees Association (GHDSTEA).
Haba pyntip ba kine ki ar tylli ki seng ki la phah ïa ka memorandum sha u Myntri Rangbah u Conrad K Sangma, u bah Pala u la ong, “Ngi thoh sha phi ha ka kyrteng jong ka KJDSTA bad GHDSTEA ban ai ïa kane ka jingai por kaba khatduh . La jan dap shibnai naduh ba ngi la pan ban ïakynduh bad ka ophis jong phi, hynrei ka jingkyrpad jong ngi ka la ïoh tang ka jingsngap jar bad lehse ka jingbym salia.”
Shuh shuh u ong, “Da ka jingsngewsih kaba khraw bad ka jingbitar, ngi la hap ban shim ïa kane ka lynti. La bun snem, ka kynhun jong ki skul deficit, kaba kynthup ïa ki nonghikai bad ki nongtrei kiba ym dei nonghikai kiba trei shitom bad kiba long ka nongrim jong ka pule puthi skul ha Meghalaya, ki la shah pynshitom da ka jingeh kaba khraw ha ka liang ka pisa, ka jingbym salia jong ki ophisar, bad ka jingbym salia jong ka rukom treikam,” u la ong.
Haba kdew ïa ki jingdawa, u bah Pala u la ong, “Katba ka 51% DA ka la dei ban ïoh naduh 1 tarik Naitung 2025 bad ka 53% DA naduh 1 tarik Kyllalyngkot 2026, ngi dang ïoh ïa ka tulop ha ka dor kaba rim jong ka 49%. Shuh shuh, ka DA arrears kaba 43% jong ki bnai Kyllalyngkot bad Rymphang 2024 ka dang sah khlem siew watla ngi la dep phah bun tylli ki jingthoh.”
Halor ka CPF, u la ong, “Katkum ka hukum sorkar kaba la pynmih ha ka 21 tarik Naiwieng 2024, ka jingnoh bynta lang jong ka sorkar sha ka Contributory Provident Fund la pynkiew sha ka 10% naduh 1 tarik Kyllalyngkot 2025. Haduh mynta, ki nongtrei ki dang ïoh tang 8%.”
“Ngi dawa ban pynmih noh mardor ïa ki instalment DA bad pynkiew ïa ka sha ka 53% kaba la buh da ka sorkar, ryngkat bad baroh ki arrears kiba dang sah. Ngi dawa ruh ban pyntreikam mardor ïa ka 10% CPF contribution jong ka sorkar ryngkat bad baroh ki arrears matching amounts kiba naduh 1 tarik Kyllalyngkot 2025,” u Pala u la ong.
Ki seng ki la dawa ruh ban pynsted ïa ka jingthungkam ïa ki post kiba la dep sanction hynrei kiba dang thylli. Ki la ong, “Ki post kiba thylli namar ba la shongthait ki la shah ieh khlem pyndap, bad kane ka la nang kham sniew namar ki notification kiba ym biang. Kane ka la ktah ïa ka jingpynïaid skul, pynbun ïa ka jingtrei jong ki nonghikai, bad ka la ktah beit ïa ki hok pule jong ki khynnah.”
Ki la dawa ruh ban shah pyllait na ka Meghalaya Non-Government School and College Employees Centralised Provident Fund Scheme, 2026, kaba ki la khot kum ka rukom treikam kaba “ym ïahap ha ka rukom treikam, ym lah ban pynksan katkum ka aiñ, bad kaba pynmyntoi tang khyndiat.”
Kiwei pat ki jingdawa ki kynthup ïa ka jingpynphai biang pura ïa ka Board of Trustees hapoh ka Act jong u snem 1969, bad ban buh ïa ka por kaba hap ban bud na ka bynta ka jingkylla na CPF sha NPS bad ka jingpynkynriah ïa ki fund.
“Phin shimkhia ba lada ym pyndep ïa baroh ki jingdawa kiba don nongrim ha shwa ne ha ka 9 tarik Risaw 2026, ka KJDSTA bad GHDSTEA kin ym don lad shuh hynrei tang ban pynlong ïa ki jingïakhih paidbah kiba jur ha baroh ka jylla. Kino kino ki jingthut kiba mih ha ki por pule, ki kam pynïaid skul, ne ki kam jong ki khynnah ha baroh ka Meghalaya kin dei pura namar ka jingbym leh eiei bad ka jingbym salia jong ka Sorkar,” la ong u Bah Pala.